Xəzərdə axtarışları davam edən şəxslər qanundan gizlənirmişlər

Azərbaycan Dövlət Sərhəd Xidmətinin (DSX) əməkdaşları tərəfindən keçirilən tədbirlər nəticəsində qaçaqmalçılıq məqsədilə Xəzər dənizində dövlət sərhədini qanunsuz keçməyə cəhd edən şəxslər aşkarlanıb. Bu barədə DSX-nin İstintaq və Təhqiqat İdarəsinin rəisi, ədliyyə polkovniki Azər İbrahimov keçirdiyi brifinqdə məlumat verib. Belə ki, Azərbaycan vətəndaşlarının Xəzər dənizində itkin düşməsi barədə kütləvi informasiya vasitələrində verilən məlumat üzrə Dövlət Sərhəd Xidməti tərəfindən aparılan dəqiqləşdirmə nəticəsində həmin şəxslərin ölkə ərazisindən Xəzər dənizinə çıxmamaları müəyyənləşdirilib, onların "Samur" buraxılış məntəqəsindən Rusiya Federasiya istiqamətində rəsmi qaydada dövlət sərhədini keçdikləri məlum olub. Dənizdə keçirilən axtarış tədbirləri zamanı qeyd olunan şəxslərin tapılmaması nəzərə alınaraq Dövlət Sərhəd Xidməti tərəfindən Rusiya Federasiyasının Sərhəd Xidməti ilə əlaqə yaradılıb, birgə keçirilən tədbirlər nəticəsində dekabrın 11-də Xəzər dənizində batmaqda olan şəxslər xilas edilərək rəsmi qaydada təhvil alınıblar. Həmin şəxslərdən birinin səhhətində ciddi problemlər olduğu üçün xəstəxanaya yerləşdirilib. Araşdırma zamanı müəyyən edilib ki, bir qrup Azərbaycan vətəndaşı - Hüseynov Məhərrəm Balaca oğlu, Əhmədov Elman Məcidoviç, Həsənov Ramil Vəliyeviç və Alxasov Dilavər İcrasoviç üzmə vasitələri əldə etmək məqsədilə dekabrın 3-də RF-in Dağıstan Respublikasına gedib və oradan iki ədəd qayıq alaraq qanunsuz yolla Xəzər dənizi ilə Azərbaycana gətirmək qərarına gəliblər. Bu məqsədlə həmin şəxslər dekabrın 5-də 2 ədəd üzmə vasitəsində açıq dənizə çıxaraq Azərbaycan istiqamətində yola düşüb, D.Alxasov isə rəsmi qaydada Azərbaycan Respublikasına qayıdıb. Lakin kəskin hava şəraiti nəticəsində onlar marşrut üzrə hərəkətlərini itirərək naməlum istiqamətdə itkin düşüblər. Eyni zamanda, qeyd olunan şəxslərin əvvəllər törətdikləri əməllərə görə DSX tərəfindən hüquqi məsuliyyətə cəlb olunmaları müəyyən edilib. Belə ki, M.Hüseynov və E.Əhmədov dənizdə sərhəd rejim qaydalarını pozduqlarına görə inzibati məsuliyyətə cəlb olunub, cinayət əməlinin təşkilatçısı D.Alxasov isə 2007-ci ildə Xəzər dənizində qanunsuz hərəkətlərə yol verdiyinə görə məhkum edilib.

Fakt üzrə cinayət işi başlanılıb, əməliyyat-istintaq tədbirlər davam etdirilir.

O.M.