Təsadüfi tanışlıq ölümlə nəticələndi
Öldürülən gəncin anası məhkəmədə istintaq orqanını saxtakarlıqda, şahidləri isə qətldə ittiham edib
Ötən ilin sentyabrın 8-də Nərimanov rayonunun İ.Abışov küçəsində yerləşən "Avrora" MMC-nin ofisinin yaxınlığında qətl hadisəsi baş verib. Bakı şəhər sakini Elman Tağıyev sərxoş vəziyyətdə "Avrora" MMC-nin əməkdaşı, 30 yaşlı Nazim Mehdiyevi aralarında baş vermiş şəxsi münaqişə zəminində döyüb. Nazim Mehdiyev ağır vəziyyətdə xəstəxanaya yerləşdirilsə də, onun həyatını xilas etmək mümkün olmayıb.
"Hadisə namus üstündə baş verib"
Sözügedən cinayət işi üzrə məhkəmə istintaqı Bakı Ağır Cinayətlər Məhkəməsində keçirilir. Məhkəmədə ifadə verən Elman Tağıyev ona elan olunmuş ittihamla özünü təqsirli bilməyib. O, ifadəsində göstərib ki, Nazim Mehdiyevi namus üstündə qətlə yetirib. Nazim Mehdiyevin baldızına sataşdığını iddia edən təqsirləndirilən sonuncunun hərəkətlərinə son qoymaq üçün onunla görüşüb.
"Onu öldürmək niyyətində olmamışam"
Onun sözlərinə görə, görüşləri heç də ürəkaçan olmayıb. Təqsirləndirilən şəxs mərhumun sərt cavabları ilə rastlaşdığını vurğulayıb: "Nazim Mehdiyev açıq-aşkar şəkildə "qızla gəzəcəyini" dedi. Onun bu cavabı əsəblərimi tarıma çəkdi. Özümü saxlaya bilməyib onu vurdum. Bir yumruq zərbəsindən sonra Nazim yerə yıxıldı. Onu öldürmək niyyətində olmamışam".
"Bacımla yanaşı anamı da bezdirmişdi"
Şahid qismində dindirilən Aidə Əliyeva ifadəsində təqsirləndirilən şəxsin həyat yoldaşı olduğunu göstərib. Aidə Əliyevanın sözlərinə görə, mərhum onun bacısına tez-tez zəng vururmuş: "Nazim bacımla yanaşı anamı da bezdirmişdi. Ona görə də bu barədə ərimə danışdım. Ərim də bu məsələnin həll edilməsi üçün Nazim Mehdiyevlə görüşəcəyini bildirdi. Bacım Nazim Mehdiyevlə tanışlıq saytında tanış olub. Tanış olan zamanda öz mobil telefon və ev telefonunun nömrəsini ona verib. Bundan sonra onlar bir neçə dəfə görüşüblər. O, Nazimin qeyri-ciddi adam olduğunu gördükdən sonra onunla görüşə son qoyub. Lakin Nazim bacımdan əl çəkməyib".
"O, bacıma hədə-qorxu gələrək onu rüsvay edəcəyini deyirdi"
Aidə Əliyeva bildirib ki, Nazim Mehdiyev bacısına və anasına hədə-qorxular gəlib. Şahid mərhumun hədə-qorxularının nədən ibarət olduğunu da açıqlayıb. Onun sözlərinə görə, Nazim Mehdiyev bacısından küllü miqdarda pul tələb edib: "Əks halda bacımı biabır edəcəyi ilə hədələyirdi. Bacımın həkim işlədiyi xəstəxanada da onun haqqında rüsvayedici faktlar səsləndirəcəyini deyirdi. Onun bu hərəkətlərinə son qoymasını ərimdən xahiş etdim. Ərim də məsələni həll edəcəyini bildirdi. Lakin işin bu yerə çatacağını bilmirdim".
"Yeznəm cinayət törədəndən sonra hadisədən xəbər tutmuşam"
Şahid qismində təqsirləndirilən şəxsin qayınatası Kamil Əliyev ifadə verib. Hadisələrdən xəbərsiz olduğunu deyən Kamil Əliyev ifadəsində göstərib ki, qızına Nazim Mehdiyev adlı birisinin elçi düşdüyünü bilib: "Mənə dedilər ki, Nazim adlı biri səninlə görüşmək istəyir və qızımızı istəyəcək. Mən də bildirdim ki, o, gənc oğlanla işim olmaz, valideynləri gələr danışarıq. Amma dedilər ki, gəncin özü əmisi oğlu ilə birlikdə gələcəklər. Mənim bildiyim bu qədərdir. Hadisələrin sonrasından isə xəbərim olmayıb. Kürəkənim cinayət törədəndən sonra hadisədən xəbər tutmuşam".
"Təqsirləndirilən şəxs oğlumu tək öldürməyib"
Mərhumun anası məhkəməyə verdiyi ifadəsində bir sıra ittihamlar səsləndirib. Evinin yeganə çörəkpulu qazananı olduğunu açıqlayan mərhumun anası bildirib ki, oğlunu təqsirləndirilən şəxs tək öldürməyib. İlyas Əliyev adlı birinin də cinayətdə iştirak etdiyini qeyd edən ananın sözlərinə görə, istintaq orqanı həmin şəxsi təqsirləndirilən şəxs qismində yox, şahid qismində işə cəlb edib.
Mərhumun anası məhkəmədə ifadə verən şahidlər - Aidə Əliyeva və Kamil Əliyevi də qətlin iştirakçıları olmaqda günahlandırıb: "Birinci oğlumun hərəkətlərindən mənə xəbər verərdilər. Daha onu niyə öldürürdülər. Digər tərəfdən də bu şəxslərin hərəkətlərində cinayət tərkibi var. Təqsirləndirilən şəxsi öyrədib oğlumu öldürtməyə bunlar vadar edib. Ona görə də bu şəxslər də məsuliyyətə cəlb edilməlidirlər".
Bu yerdə həmişəki kimi müəllifdən son söz əvəzi ola bilərdi. Lakin son sözü məhkəmə deyəcəyi üçün bu dəfə biz sükutumuzu qoruyuruq. Məhkəmə prosesi davam edir...
İnarə Rafiqqızı
O.M.