Ombudsman İstintaq və müvəqqəti saxlanma təcridxanalarına baş çəkib

Ombudsman İstintaq və müvəqqəti saxlanma təcridxanalarına baş çəkib

31 Oktyabr 2011 20:51
Bəyəndim (0) Bəyənmədim (0)

İşgəncələr əleyhinə Milli Preventiv Mexanizmin (MPM) funksiyalarının icrası məqsədilə Azərbaycan Respublikasının İnsan Hüquqları üzrə Müvəkkili Elmira Süleymanova və onun MPM qrupunun üzvləri azadlıqdan məhrumetmə və məhdudlaşdırma yerlərində, o cümlədən penitensiar müəssisələr, müvəqqəti saxlama təcridxanaları (MST), psixiatriya xəstəxanaları və müvafiq sosial obyektlərdə müntəzəm olaraq planlı monitorinqlər aparır, qısa və uzunmüddətli başçəkmələri davam etdirirlər.

Ombudsman Aparatının mətbuat xidmətindən verilən məlumata görə, Ombudsman MPM qrupunun üzvləri olan Gəncə Regional Mərkəzinin əməkdaşları ilə birgə Ədliyyə Nazirliyi Penitensiar Xidmətinin bu şəhərdəki 2 saylı İstintaq Təcridxanasına başçəkmə həyata keçirib. O, bu təcridxanada bir sıra saxlanılan şəxsi, o cümlədən uşaqları qəbul edib, təkbətək söhbət aparıb, onlara hüquqlarını izah edib. Söhbət zamanı həmin şəxslər saxlanma şəraitindən və müəssisə əməkdaşlarının onlara qarşı rəftarından şikayət etməyiblər. Eyni zamanda tutularkən Gəncə Şəhər Baş Polis İdarəsinin Kəpəz Rayon Polis İdarəsində (RPİ) və Şəmkir RPŞ-də baş vermiş kobud rəftardan, habelə barələrində aparılan istintaqdan narazılığını bildirən olub. Ombudsman Gəncə Şəhər Baş Polis İdarəsinin rəisi ilə görüşüb, Müvəkkilin Gəncə regional mərkəzinin nümayəndələrinin polis əməkdaşları ilə birgə qeyd olunan məsələnin araşdırılmasını tapşırıb.
Müvəkkil həmçinin MPM qrupunun üzvləri olan Gəncə və Şəki regional mərkəzlərinin əməkdaşları ilə birgə müvafiq olaraq, Gəncə Şəhər Baş Polis İdarəsi və Şəki RPŞ-nin MST-lərinə baxış keçirib. Baxış zamanı saxlanılan şəxslərlə təkbətək söhbət aparılıb, onlara hüquqları izah olunub, saxlanılmanın qanuniliyini təsdiq edən sənədlər yoxlanılıb. Habelə MPM barədə ətraflı məlumat verilib, saxlanma şəraitinin müvafiq normalara uyğunluğu, həmin şəxslərin vəkillə təmin olunması, hər hansı kobud rəftara məruz qalıb-qalmamağı, tibbi yardımın göstərilməsi, saxlanma şəraiti ilə əlaqədar kameraların normal işıqlanma və ventilyasiyası, ibadət otağının olması, gündəlik isti yeməyin verilməsi, gigiyena tələblərinə riayət edilməsi vəziyyəti yoxlanılıb. Söhbət aparılmış şəxslər saxlanma şəraitindən, müəssisə rəhbərliyi və əməkdaşları tərəfindən onlara qarşı rəftardan narazılıq bildirməyiblər. Ombudsman baxış keçirilmiş müəssisələrin rəhbərliyinə saxlanma şəraitinin daha da təkmilləşdirilməsi ilə bağlı müvafiq tövsiyələr verib.

İnsanın ən əsas hüququ insan kimi yaşamaq hüququdur...

Hafiz Əhmədov

O.M.