Dövlətə xəyanətdə ittiham olunan şəxsin şikayəti üzrə məhkəmə başlayıb

Bakı Apellyasiya Məhkəməsində dövlətə xəyanətdə ittiham olunan Nardaran sakini İnqilab Əhədovun apellyasiya şikayəti üzrə məhkəmə prosesi başlayıb.

Hakim Faiq Qasımovun sədrlik etdiyi ilkin baxış iclasında anket məlumatları dəqiqləşdirilib. Məhkəmənin baxış iclası iyulun 25-nə təyin edilib.

İttihama görə, Əhədov İnqilab Xəlil oğlunun xarici xüsusi xidmət orqanı əməkdaşları tərəfindən məxfi əməkdaşlığa cəlb edilərək 2011-ci ildən etibarən mütəmadi olaraq həmin orqan tərəfindən verilən tapşırıqları yerinə yetirməsi və Azərbaycan dövlət təhlükəsizliyi zərərinə casusluq edərək dövlətə xəyanət etməsinə əsaslı şübhələr müəyyən olunub. Bununla əlaqədar İ.Əhədov DTX-nın İstintaq Baş İdarəsi tərəfindən aparılan cinayət işi üzrə şübhəli şəxs qismində tutularaq 27 yanvar 2016-cı il tarixdə Cinayət Məcəlləsinin 274-cü (dövlətə xəyanət) maddəsi ilə təqsirləndirilən şəxs qismində cəlb edilib, məhkəmənin qərarı ilə barəsində həbs qətimkan tədbiri seçilib.

Bakı Ağır Cinayətlər Məhkəməsinin hökmü ilə İ. Əhədov 5 il müddətinə azadlıqdan məhrum edilib. (apa)

Mediainfo.az