20 il “yatan” yenidən həbsdə - Foto

20 ilə yaxın həbsxana həyatı yaşayan Tərtər rayon sakini 48 yaşlı Zakir Verdiyev Nizami rayon Polis İdarəsinin əməkdaşları tərəfindən yenidən saxlanılıb.

APA TV-nin xəbərinə görə, ümumilikdə 7 mənzil qarətində təqsirləndirilən Verdiyev oğurluqları damdan evə keçməklə həyata keçirdiyini bildirib.

Nizami rayonunda saxlanılan şəxs Xətai rayonunda da oğurluq törədib. Sonuncu oğurluq epizodunu martın 6-da saat 20:30 radələrində İnarə Orucovaya məxsus mənzilə damdan kəndirlə girməklə törədib. O, zərərçəkmiş İnarə Orucovaya məxsus dəyəri 3000 manat olan qızıl-zinət əşyalarını oğurlamaqla maddi ziyan vurub. Nizami RPİ-nin əməkdaşları tərəfindən keçirilən əməliyyat-axtarış tədbirləri nəticəsində əvvəllər məhkum olunan Zakir Verdiyevin yeri müəyyən olunaraq həbs edilib.

Faktla əlaqədar Cinayət Məcəlləsinin müvafiq maddəsi ilə cinayət işi açılıb, araşdırma aparılır.

Mediainfo.az