Qatilin İşi 17 il sonra yenidən araşdırılacaq

Bu gün Bakı Ağır Cinayətlər Məhkəməsində 17 il əvvəl qətl törətməkdə təqsirli bilinən Varis Səmədovun cinayət işi üzrə məhkəmə prosesinin növbəti iclası olub. Hakim Əlövsət Abbasovun sədrliyi ilə keçən prosesdə ittihamçı-prokuror Varis Səmədovun cəzasının ağırlaşdırılması ilə bağlı vəsatətlə çıxış edib. Dövlət ittihamçısı işin ibtidai istintaqa qaytarılmasını və Varis Səmədova daha ağır cəza verilməsini istəyib. Məhkəmə vəsatəti təmin edib və məhkəmə istintaqını dayandırıb. İş araşdırılması üçün ibtidai istintaqa qaytarılıb.

Qeyd edək ki, 1997-ci ilin 23 avqust tarixində Zülfüqar Ağalarov adlı şəxsin meyiti Nəsimi rayon Hərbi Komissarlığının arxasında aşkar edilib. O, odlu islahla öldürülüb. Aparılan araşdırmalar nəticəsində məlum olub ki, Varis Səmədov tanışı Zülfüqar Ağalarovu borc məsələsi üstündə mübahisə zəmində tapança ilə güllələyərək qətlə yetirib. Bundan sonra Varis Səmədovun cinayət məsuliyyətinə cəlb olunması barədə qərar qəbul edilib, barəsində axtarış elan olunub. Lakin Varis Səmədov (Rəşitov Həmid Məcidoviç) ad-soyadını dəyişdirdiyinə görə onun yaşadığı yeri müəyyənləşdirmək qeyri-mümkünə çevrilib. 2002-ci ildə Varis Səmədovun əməlləri Cinayət Məcəlləsinin 95-ci maddəsindən Cinayət Məcəlləsinin 120.1 və 228.1-ci maddəsinə tövsif edilir. Ona Cinayət Məcəlləsinin 120.1 (qəsdən adam öldürmə) və 228.1-ci (qanunsuz odlu silah əldə etmə, saxlama, daşıma və gəzdirmə) maddələri ilə ittiham irəli sürülüb. Nəhayət, Varis Səmədov 2002-ci ilin oktyabr ayında istintaqa gəlib və 1 saylı istintaq təcridxanasına yerləşdirilib. 2003-cü ilin fevral ayında Nəsimi rayon məhkəməsi tərəfindən Varis Səmədov barəsindəki həbs-qətimkan tədbiri ləğv olunub, qohumlarının nəzarətinə verilməsi haqqında qərar qəbul edilib. Lakin sonradan təkrar məhkəmə-psixatrik ekspertizası təyin edilib və Bakı şəhər prokurorunun təqdimatına əsasən, Səbail rayon Məhkəməsində təqsirləndirilən şəxsin tibb müəssisəsinə yerləşdirilməsi barədə qərar qəbul olunub. Varis Səmədov istintaqdan gizləndiyi üçün ekspertiza keçirilməsi mümkün olmadığından onun barəsində axtarış elan edilib. Ötən ilin avqust ayında Varis Səmədov istintaqa könüllü gəldiyindən cinayət işi üzrə icraat təzələnib və o, Bakı İstintaq təcridxanasına salınıb.

Mediainfo.az