Qətlə yetirilən kriminal avtoritet Kamçibek Kolbayevin sərvəti 1 milyard dollar olub

Kriminal avtoritet Kamçi Kolbayevin (Kamçıbek Asanbek, “Kolya-Qırğız”) qanunsuz əldə etdiyi bütün aktivlərinin ilkin dəyəri təqribən 1 milyard dollar təşkil edir. Bu barədə Qırğızıstan Milli Təhlükəsizlik Dövlət Komitəsi (MTN) məlumat yayıb, 24.kg xəbər verir.

“2008-ci ildən başlayaraq mütəşəkkil cinayətkar qrupun fəaliyyətinin təhlili göstərir ki, Kamçıbek Asanbek özünü və ona yaxın olan şəxsləri qanunsuz olaraq varlanmaq məqsədi ilə sistemli və məqsədyönlü şəkildə “cinayətkar imperiya” yaradıb. Onun kriminal mühitdə mövqeyi möhkəmləndikcə qeyri-qanuni maliyyə aktivləri də proporsional olaraq, o cümlədən həm Qırğızıstanda, həm də xaricdə nüfuzlu sahibkarların, orta və iri biznes nümayəndələrinin hesabına artıb”, - deyə MTN bildirir.
Kolbayevin, onun qohumlarının və silahdaşlarının qeyri-qanuni aktivlərinə 850-dən çox daşınmaz əmlak daxildir. Bunlar dəbdəbəli malikanələr, kotteclər, elit klub evləri, tikilməkdə olan binalardakı çoxsaylı mənzillər, istirahət mərkəzləri, pansionatlar, restoranlar, həmçinin torpaq sahələri, ovçuluq və tövlələrdir. Bundan əlavə, aktivlər arasında zirehli avtomobillər, zinət əşyaları və digər əmlak da daxil olmaqla 60-dan çox bahalı lüks avtomobil var.

İstintaqla müəyyən edilib ki, əmlakın bir hissəsi qanunsuz olaraq dövlət mülkiyyətindən çıxarılıb və faktiki olaraq sahibkarlardan alınıb. Onlar aidiyyəti dövlət qurumlarına və zərərçəkmiş şəxslərə qaytarılacaq.

Kolbayevin qruplaşmasının qeyri-qanuni varlanmasının digər mənbəyi məhbuslardan, onların qohumlarından və adi sahibkarlardan qondarma oğru xəzinəsini doldurmaq adı altında sistemli şəkildə pul qoparması olub. MTN “belə cinayət əməllərinin kökünü kəsəcəyinə” söz verib.

Əziz MUSTAFA