Onkoloq: "Günəşdən qorunun ki, xərçəngə tutulmayasınız"

"Dəri xərçəngi iqlimi isti olan ölkələrdə geniş yayılıb. Azərbaycanda da dəri xərçənginə Kür-Araz ovalığı, Naxçıvan Muxtar Respublikası və Aran rayonlarında yaşayan əhali arasında daha çox rast gəlinir".

Bu barədə Milli Onkologiya Mərkəzinin Poliklinika şöbəsinin həkimi Elçin Mansurov məlumat verib. O bildirib ki, xəstəliyin yayılmasına səbəb insanların özlərini günəşin zərərli təsirindən qorumaması, özünüqoruma vasitələrindən istifadə etməməsidir. E.Mansurovun sözlərinə görə, mütəmadi olaraq günəş şüasının zərərli təsirinə məruz qalan insanlarda bədənin açıq nahiyələrində-üz, alın, baş dərisi, boyun, əllərdə dəri xərçəngi xəstəliyi yaranır".

Həkim dəri xərçəngindən qorunmaq üçün çimərliklərə gedən vətəndaşlara məsləhət də verib: "İnsanlara adətən dəniz kənarına gündüz saat 12-yə qədər, günün ikinci yarısı isə 17-dən sonra getmək məsləhət görülür. Təəssüf ki, bu saatlarda qaralmaq üçün qoruyucu vasitələrdən istifadə etmirlər, günəşin zərərli şüalarına məruz qalırlar. Bu isə gələcəkdə müəyyən fəsadların yaranmasına səbəb ola bilər"

O.M.