Sürücülərin ödədikləri cərimələr DYP-nin hesabına oturmadı

Bu gün bir qrup sürücü Azərbaycan Respublikası Baş Dövlət Yol Polisi İdarəsinin qarşısına toplaşaraq etiraz ediblər. Şikayətçilərin ANS-in "qaynar xətt"inə verdikləri məlumata görə, onların şikayətinə səbəb ödədikləri cərimənin kompüterə oturmaması və onların yol polisi tərəfindən saxlanılması olub.

Samir Həsənli adlı sürücünün sözlərinə görə, təxminin 2 ay bundan qabaq yol hərəkətini pozub və polis tərəfindən cərimələnib. Ona cəriməni ödəmək üçün blank verilib. O da banka əsasən cəriməni ödəyib.
"Dünən Bakı-Sumqayıt yolunda polis məni saxladı. Məlum oldu ki, idarə etdiyim "VAZ-2106" markalı avtomobil axtarışdadır. Səbəbi isə cəriməni ödəməməyim göstərilib. Əlimdə çek olsa da, mənə inanan olmadı və maşını cərimə meydançasına apardılar", - deyə Samir Həsənli şikayətləndi.
İndi 3 saata yaxındır polis idarəsində növbədə dayanan sürücü cəriməni ödədiyi halda ondan əlavə pul tələb edildiyini bildirdi.
Baş Dövlət Yol Polisi İdarəsindən faktla bağlı bildirdilər ki, məsələ heç də sürücülərin dediyi kimi deyil. Kapitan Samir Cəbrayılovun sözlərinə görə, yol polisi cəriməni vaxtında ödəməyən sürücülərin avtomobillərini saxlayıb. Sadəcə olaraq, bəziləri cəriməni vaxtında ödəsə də, bu texniki səhv ucbatından kompüterə düşməyib. İndi bu yoxlanılır. Sürücülərin uzun müddət növbədə dayanması isə şikayətçilərin çox olması ilə əlaqədardır. Qeyd edək ki, sonda yol polisi bildirdi ki, bütün anlaşılmazlıq aradan qaldırılacaq və heç kimin ödədiyi cərimə pulu batmayacaq.
Qeyd edək ki, iyulun 1-dən qüvvəyə minən "Yol hərəkəti haqqında qanun"a edilən əlavə və dəyişikliklərdə (qanunun 85-1-ci maddəsinin 9-cu bəndi) qeyd olunur ki, inzibati xəta törətmiş şəxs müvafiq məbləği banka ödədikdə, bu barədə ona bank tərəfindən qəbz verilir. Qaydalara görə, ödənişi qəbul edən bank cərimə bildirişinin nömrəsi əsasında müvafiq ödənişin edildiyi barədə 1 iş günü ərzində yol polisinə məlumat verir. Qaydalara görə. inzibati xəta törətmiş sürücü cərimənin banka ödənilməsi ilə bağlı yol polisini məlumatlandırmamalıdır. Yeni dəyişikliklərə görə, inzibati xəta törətmiş şəxsin plastik kart vasitəsilə cəriməni ödəmək imkanı olmadıqda, ona cərimənin bank vasitəsilə ödənilməsi üçün bildiriş verilir və bu barədə protokolda qeyd aparılır. Cərimə bildirişi xüsusi hazırlanmış və Azərbaycan Respublikasının müvafiq icra hakimiyyəti orqanının əməkdaşlarına nömrə üzrə ciddi hesabatla verilən blank formasında tərtib edilir.

Nədənsə bizdə Dövlət Yol Polisi "Dövlət Cərimə Polisi" funksiyasını yerinə yetirir...

Sərvər Aslanov

O.M.