Türkiyədəki zəlzələnin Azərbaycana təsiri olmayacaq

Respublika Seysmoloji Xidmət Mərkəzinin direktoru Türkiyədə baş verən zəlzələnin Azərbaycandakı seysmik duruma təsirinə aydınlıq gətirib

Türkiyədə baş verən zəlzələnin Azərbaycandakı seysmik duruma heç bir təsiri yoxdur. Azərbaycan ərazisi əvvəlki kimi seysmik aktivliyi fon səviyyəsində olan ölkələr sırasındadır.
Ölkə ərazisində seysmik aktivlik yoxdur. Bu barədə APA-ya Azərbaycan Milli Elmlər Akademiyasının (AMEA) Respublika Seysmoloji Xidmət Mərkəzinin direktoru Qurban Yetirmişli bildirib. Onun sözlərinə görə, Türkiyə ərazisində baş verən dünənki zəlzələdən sonra daha bir neçə güclü təkan baş verib: "Bu olmalıdır. Çünki o cür güclü zəlzələdən sonra avtoşoklar olur. Bu cür təkanlar bu gün də qeydə alınıb. İlk baş verən zəlzələ Naxçıvan ərazisində hiss olunmuşdu. Naxçıvanda, Sədərəkdə, Şərurda 3-3,5 bal gücündə hiss olunub. Sonrakı avtoşoklar isə Azərbaycan ərazisində hiss edilməyib". Q.Yetirmişli onu da qeyd edib ki, Türkiyədə zəlzələnin baş verdiyi dərinlik qırılmasının Azərbaycana aidiyyəti yoxdur: "Dərinlik qırılması baş verəndə hansı qırılma qanadının aktiv olmasına diqqət yetirilir. Müəyyən bir dövrdən sonra həmin qırılmanın başqa bir qanadında aktivlik ola bilər. Belə aktivlik yaxınlıqda olan zəlzələ ocaqlarını oyada bilər. Amma fon səviyyəsində olan və heç bir gərginlik toplanması olmayan ərazidə zəlzələlər oyana bilməz".

Zəlzələ insanların canına salıb vəlvələ...

Hafiz Əhmədov

O.M.