Türkiyə İsrailin yardım təklifindən imtina etdi

CNN Türk-ün yerli rəsmilərə istinadən verdiyi məlumata görə, humanitar və xilasetmə heyətindən ibarət yardım təklif etmiş ölkələrin Azərbaycan, İsrail, ABŞ, İngiltərə, Almaniya, Polşa, Macarıstan, İsveçrə, Ermənistan, Yunanıstan və Avropa Birliyi olduğu bildirilir. Rəsmi Tehran da oxşar müraciət edərək, yardım göndərməyə hazır olduğunu deyib. ABŞ-ın Türkiyədəki səlahiyyətli səfiri təbii fəlakətlə bağlı yazılı bəyanat verərək, zəlzələ qurbanlarına başsağlığını ifadə edib. Səfir Fransiz Rikkiardone yardım məqsədilə əlindən gələn yardımı əsirgəməyəcəyinə söz verib.

NATO baş katibi Anders Foq Rasmussen yazılı bəyanatında Vanda çoxlu sayda insan həyatına son qoymuş və böyük dağıntılara bais olmuş zəlzələ xəbərini dərin üzüntü ilə qarşıladığını ifadə edib, ehtiyac olarsa, qurumun ölkəyə yardım göndərəcəyini bildirib.
Son vaxtlar Türkiyə ilə münasibətlərin pisləşməsinə baxmayaraq, İsrail hökuməti də Türkiyəyə hadisə ilə bağlı dəstək olduğunu bildirib. İsrailin Türkiyədəki səfirliyi İsrailin xarici işlər naziri Aviqdor Liberman adından ölkə rəhbərliyinə başsağlığı məktubu yollayıb. Məktubda İsrailin Türkiyəyə hər növ yardım göndərməyə hazır olduğu bildirilir. Ancaq Türkiyə İsrailin yardımından imtina edib. Bu barədə İsrailin müdafiə naziri Ehud Barak İsrail telekanalına müsahibəsində bildirib. "Bizdə belə bir təəssürat yarandı ki, Türkiyə tərəfinə İsrailin köməyi lazım deyil. Amma əgər fikirlərini dəyişsələr və əlavə yardıma ehtiyacları olsa, bizə həmişə müraciət edə bilərlər", deyə nazir qeyd edib.

Reuters agentliyinin məlumatına görə, Rəcəb Tayyib Ərdoğan Ermənistan prezidenti Serj Sarkisyanın başsağlığı məktubunu və yardım təklifini qəbul edib. Baş nazir ehtiyac yaranacağı təqdirdə, Ermənistana müraciət edəcəklərini bildirib.

Təbii fəlakətin milləti, dini, sosial mənsubiyyəti olmaz. O, ümumən insanlığın düşmənidir...

Sərvər Aslanov

O.M.