Milli Məclisdə susan deputatlar qınaq hədəfində!

Elşad Paşasoy: "Çox danışanda iradlar tutulduğu üçün çoxları çıxış etməyə ehtiyatla yanaşırlar"; Vahid Əhmədov: "Yeni deputatlar siyasi arenada təzə olduqları üçün çəkinirlər"

"O məclisdə mən elə deputatlar gördüm ki, 5 ildə bir dəfə də ağızlarını açmadılar və mən indi də onların adını bilmirəm. Çünki bu adam bir dəfə danışmadı, bir dəfə səfərə çıxmadı. Sakitcə gəlib bir küncdə oturur və çıxıb gedir. O məclisdə 15-20 ildə ağzını bir dəfə açmayan deputatlar varsa, sən onları nə cür tanıyacaqsan?" Bu sitat keçmiş millət vəkili Sabir Rüstəmxanlının "Yeni Müsavat"a müsahibəsində yer almışdı.

Hər zaman cəmiyyətin müzakirə etdiyi mövzulardan olan "susqun deputatlar" bu dəfə də gündəmdədir. Məlum, parlamentin sessiyası öz işini tamamlamaq üzrədir. Amma bu günə qədər seçicisinə səsini tribunadan çatdırmayan, susqunluğun gerçəkdən qızıl olduğunu düşünən deputatlar var. Onlar bir qayda olaraq müzakirələrdə iştirak etmirlər, çıxış üçün yazılmır və jurnalistlərdən künc-bucaq qaçırlar.

İlkin versiyalar odur ki, deputatın çox danışması Milli Məclis rəhbərliyi tərəfindən o qədər də xoş qarşılanmır. Zaman-zaman bu cür "danışqan" deputatlara gizli və açıq şəkildə xəbərdarlıq edilir, çox danışmağın o qədər də xoş olmadığı barədə mesajlar verilir. Bu isə müzakirələrin bəzən arzulanmayan mətləblərə toxunmasının qarşısını almaq məqsədi güdür.

"Yeni Müsavat"ın parlament yazarı Elşad Paşasoy bildirdi ki, Milli Məclisdə bir sıra deputatlar sanki parlament iclaslarında dinləyici funksiyasını yerinə yetirmək üçün iştirak edirlər.

Müsahibimizin sözlərinə görə, onların, sadə dillə desək, danışmaqla araları yoxdur: "Bir sıra hallar olub ki, onlara özəl müsahibə üçün müraciət etmişəm. Hər dəfə də deyiblər ki, "nə ehtiyac var müsahibəyə"? Sonra da deyirlər ki, biz onsuz da seçicilərin problemlərinin həllində iştirak edirik, ona görə də danışmağa ehtiyac görmürük. Parlament Jurnalistlər Birliyinin illik sorğuları olur. O sorğularda aktiv və passiv deputatları müəyyənləşdirirdik. Bir sıra hallarda danışmayan, fəallığı ilə diqqət çəkməyənlər çox sərt reaksiya verirdilər ki, parlament jurnalistlərinin onların fəaliyyətindən xəbəri yoxdur deyə onları passiv hesab edirlər. Amma parlament danışmaq üçün bir tribunadır. Qanunda da yazılıb ki, deputatlar danışdıqları üçün hüquqi məsuliyyət daşımır".

Həmkarımız dedi ki, parlamentin sonuncu tərkibi ilə bağlı maraqlı müşahidə olub. Onun sözlərinə görə, "deputatlar niyə danışmır" tipli yazılar mediada yer alandan sonra bir sıra deputatlar aktivləşiblər: "Onlar yarışa girirmiş kimi, aktiv söz almağa başladılar. Bu da diqqətdən qaçmadı. Elə deputatlar var ki, bir neçə çağırışdır parlamentdə təmsil olunurlar, onlar danışmağı, söz alıb çıxış etməyi təhlükəli hal hesab edirlər. Bəzi hallarda mövcud problemlərdən danışanda sərt təpkiyə məruz qalırlar, çıxışları kəsilir. İqtidara yaxın deputatlar çox danışanda iradlar tutulur, tənbeh də olunurlar. Ola bilsin ki, onlar bu mənada çıxış etməyə ehtiyatla yanaşırlar. Düşünürlər ki, nəsə danışsalar, kiməsə xoş gəlməyə bilərlər. Amma ən zərərsiz mövzularda belə danışmağa tərəddüd etmələri qəribə görünür".

"Danışılan yerə danışmamaq üçün gedilməsinin özü də sual doğurur" deyən E.Paşasoy bu məsələ ilə bağlı bir təcrübəsini də xatırlatdı. Bildirdi ki, yeni seçilən deputatlardan birinə müsahibə üçün müraciət edəndə öncə qəzetin adını soruşub və "Yeni Müsavat" adını eşidən kimi "lazım olanda mən özüm deyəcəm" cavabını verib: "Hətta mətbuata da danışmırlar, özlərini də təqdim etməyə risk etmirlər".

Deputat Vahid Əhmədov isə hesab edir ki, Milli Məclisdə aktiv millət vəkilləri çoxdur. Onun sözlərinə görə, uzun müddətdir parlamentdə təmsil olunanlar hər zaman aktiv mövqeləri, çıxışları ilə fərqlənirlər: "Bəziləri siyasi səhnədə yenidirlər, ona görə də siyasi areanda fikir söyləməyə çəkinirlər. Yəqin ki, bir-iki il sonra danışarlar. Danışan millət vəkilləri isə olduqca maraqlı mövzulara toxunurlar. Əhalini, xalqımızı narahat edən mövzuları müzakirəyə çıxarırlar".

Müsahibimiz çox danışmağın siyasi baxımdan o qədər də xoş qarşılanmaması ilə bağlı fikrin yanlış olduğunu dedi. "Çox danışanlardan biri də mənəm" deyən müsahibimiz buna görə heç vaxt parlament rəhbərliyinin qınağına tuş gəlmədiyini və buna imkan vermədiyini dedi: "Biz əhalinin problemlərinə, xarici dünyada baş verənlərə toxunuruq. Milli Məclis rəhbərliyi də buna irad tutmur. Parlament danışmaq üçündür. Deputatlar küçədə danışmalı deyillər ki. Seçicisinin fikirlərini çatdırmalı olan deputat Milli Məclisin tribunasından istifadə etməlidir. Danışmağı qüsur hesab etmirəm".

Mediainfo.az