Vəkilin işi Ali Məhkəməyə göndərilib

Bakı Apellyasiya Məhkəməsində həbsdə olan kriminal avtoritetə telefon keçirməkdə təqsirli bilinən məşhur vəkil Kamandar Rəfi oğlu Nəsibovun apelyasiya şikayəti üzrə məhkəmə keçirilib.

Ədliyyə Nazirliyinin Penitensiar xidmət əməkdaşları tərəfindən 8 saylı cəzaçəkmə müəssisəsində cəza çəkən məhkum Nadir Nəriman oğlu Səlifovla görüşə gəlmiş vəkili Kamandar Rəfi oğlu Nəsibovun üzərinə baxış keçirilib. Baxış zamanı onun əynindəki şalvarının içəri hissəsində gizlədilmiş, daxilində "Azercell" danışıq kartı olan 1 ədəd "Huawei" markalı modem aparatı aşkar edilərək götürülüb.

Nadir Səlifov Cinayət Məcəlləsinin 182.3.1; 182.3.2; 29.149.2.1; 29.149.2.4; 29.149.2.5; 317-2.1 və 67 maddələri ilə təqsirli bilinərək azadlıqdan məhrum edilib. Kamandar Nəsibovun barəsində Cinayət Məcəlləsinin 29, 317-1.1-ci (cəzaçəkmə müəssisələrində və ya istintaq təcridxanalarında saxlanılan şəxslərə qadağan olunmuş əşyaların yoxlamadan gizlətməklə və ya hər hansı digər üsulla verilməsi və ya ötürülməsinə cəhd) maddəsi ilə ittiham edilib.

Qaradağ rayon Məhkəməsinin hökmü ilə Kamandar Nəsibova cərimə cəzası kəsilib. Hökmdən narazı qalan Kamandar Nəsibov apellyasiya şikayəti verib. O, barəsində bəraət hökmünün çıxarılmasını istəyib.
Hakim Vüqar Məmmədovun sədrliyi ilə keçirilən prosesdə Kamandar Nəsibovun şikayəti üzrə keçirilən proses baş tutmayıb. Buna səbəb Kamandar Nəsibovun məhkəmənin ilkin baxış iclasının qərarından kassasiya şikayəti verməsi olub.

Kamandar Nəsibov məhkəmənin qərarından Ali Məhkəməyə şikayət edib. Bu səbədən apellyasiya instansiyasında iş dayandırılıb və iş materialları baxılması üçün Ali Məhkəməyə göndərilib.

Mediainfo.az