Səhiyyə Nazirliyindən Lökbatandakı hadisə ilə bağlı açıqlama

Azərbaycan Səhiyyə Nazirliyi Bakının Qaradağ rayonunun Lökbatan qəsəbəsində bir neçə yaşayış binasında təbii qazdan baş vermiş kütləvi zəhərlənmə ilə əlaqədar rəsmi məlumat yayıb.

Səhiyyə Nazirliyinin mətbuat xidmətinin rəhbəri Anar Qədirli bildirib ki, 115 nəfər qazdan zəhərlənib. Onlardan 70-nə hadisə yerində yardım göstərilib və evə buraxılıb. Zərərçəkənlərin 45-i Səhiyyə Nazirliyinin Toksikologiya Mərkəzinə gətirilib. Onlardan 43-ü hospitalizasiya edilib. Həmin xəstələrin səhhətləri üçün təhlükə olmadığından onların hamısı gecə evə buraxılıb.

Qazdan zəhərləndiyi üçün öldüyü bildirilən sakinlərdən biri olan 45 yaşlı Natalya Məmmədovanın bu hadisənin təsiri nəticəsində öldüyü ehtimal edilmir.

Qeyd edək ki, axşam saatlarında qəsəbədə 3-4 beşmərtəbəli yaşayış binasında kütləvi zəhərlənmə baş verib.

"Azəriqaz"dan" Trend-ə verilən məlumata görə, insanların zəhərlənməsi təbii qazın tərkibində odorant maddəsinin həddən artıq böyük dozası nəticəsində baş verib.

Bakının Qaradağ rayonu Lökbatan qəsəbəsində bir neçə beşmərtəbəli yaşayış binasında təbii qazdan baş verən kütləvi zəhərlənmə ilə bağlı Bakı şəhər prokurorluğunda cinayət işi açılıb.