Elnarə Tofiqqızının işi Respublika Prokurorluğunda araşdırılaraq yenidən rayon Prokurorluğuna qaytarılıb
Bakı Slavyan Universitetinin dekanı, tənqidçi Elnarə Tofiqqızının ölümü ilə bağlı başlanan cinayət işi Respublika Prokurorluğunda araşdırılaraq yenidən Nəsimi Rayon Prokurorluğuna qaytarılıb.
Bu barədə Apa-ya mərhumun həyat yoldaşı, jurnalist Anar Niftəliyevin vəkili Səməd Vəkilov açıqlama verib.
Onun sözlərinə görə, Respublika Prokurorluğunun göstərişi ilə istintaqı aparan müstəntiq dəyişdirilib: "Bir qədər əvvəl zərərçəkən Anar Niftəliyevin müraciəti əsasında cinayət işinin materialları öyrənilməsi üçün Respublika Prokurorluğuna göndərilmişdi. Hazırda iş Respublika Prokurorluğunun rəhbər göstərişləri ilə birlikdə Nəsimi Rayon Prokurorluğuna göndərilib. Cinayət işini aparan müstəntiq Ələkbər Rzayev səhhətində yaranan problemlərlə əlaqədar olaraq müvəqqəti olaraq işdən kənarlaşdırılıb. Hazırda Elnarə Tofiqqızının cinayət işi müstəntiq Hafiz Əliyevin icraatına verilib".
Bu həftə mərhum E.Tofiqızının ölümünün səbəblərini araşdıran komisyon tibbi ekspertizanın rəyinin açıqlandığını xatırladan S. Vəkilov vurğulayıb ki, bununla bağlı zərərçəkmiş tərəfin də ekspertlərə ünvanladığı suallar prokurorluğa təqdim olunub.
Səhiyyə Nazirliyi tibbi ekspertlərinin rəyinə görə, E.Niftəliyevanın "Medi Sina" klinikasında əməliyyatdan əvvəl müayinələrin aparılmasında, xəstənin cərrahiyyə əməliyyatına hazırlanmasında, anesteziya metodunun seçilməsində və onun adına tibbi sənədlərin tərtib edilməsində tibb işçiləri tərəfindən nöqsanlara yol verilib.
Xatırladaq ki, 1977-ci il təvəllüdlü Elnarə Tofiqqızı bu il sentyabrın 20-də Nəsimi rayonunda yerləşən "Medi Sina" Tibb Mərkəzində süd vəzi kanalının əməliyyatı zamanı vəfat edib. E.Tofiqqızının meyiti müayinə olunmaq üçün Məhkəmə-Tibbi Ekspertizası və komisyon müayinədən keçirilib. Ekspertizanın ilkin rəyinə görə, E.Tofiqqızının asfiksiyadan (nəfəs çatışmazlığından) öldüyü məlum olub. Hadisə ilə bağlı E.Tofiqqızının əməliyyatında iştirak edən həkimlər prokurorluqda ifadə verib. E.Tofiqqızının həyat yoldaşı, jurnalist Anar Niftəliyevin də ifadəsi alınıb.
Faktla bağlı sentyabrın 25-də Nəsimi Rayon Prokurorluğunda Cinayət Məcəlləsinin 314.2 (səhlənkarlıq - ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi açılıb.
