Bakıda qadınlara qarşı zorakı hərəkətlər edən şəxs ələ keçdi
Ötən gün saat 20:20 radələrində Bakının Nizami rayonunda Q.Qarayev prospekti 3 ünvanında qadını küçənin ortasında vəhşicəsinə döyüblər. Rayon Polis İdarəsinin 25-ci polis bölməsindən verilən məlumata görə, naməlum şəxs Bakı şəhər sakini Səlminaz Hacıyevaya hücum edib. Qadının ağzını əli ilə tutan şəxs onu yerə yıxıb. Qadının əlindən çantasını alıb. Daha sonra qadını təpikləyib. Həmin şəxs qadının kürəyindən və qolundan möhkəm vurub. Daha sonra qadının üzüyünü barmağından çıxartmaq istəyib. Buna nail ola bilməyən şəxs hadisə yerindən qaçmaq istəyib. Lakin onu Nizami rayon Polis İdarəsi 25-ci polis bölməsi əməkdaşları yaxalayıb.Araşdırmalar zamanı məlum olub ki, hadisəni törədən şəxs bir neçə qadını eyni üsul ilə döyüb və qarət edib. Faktla bağlı araşdırma aparılır.
