Yakutiya meşələrində yanğınların sahəsi 1 milyon hektarı ötüb

Fövqəladə Hallar Nazirliyi: Yakutiya meşələrində yanğınların söndürülməsi ilə təxminən 2 min xilasedici məşğuldur
Hazırda Yakutiyada 132 meşə yanğını qeydə alınıb, onların sahəsi 1 milyon hektardan çoxdur. Bu barədə Rusiya Fövqəladə Hallar Nazirliyi məlumat yayıb.

Yanğınların söndürülməsində 222 ədəd xüsusi texnika ilə 1960 xilasedici iştirak edir. Son 24 saat ərzində mütəxəssislər 23 min hektar sahədə altı yanğını söndürməyə, 15 min hektardan çox sahədə üç yanğını lokallaşdırmağa nail olublar.

Qeyd olunur ki, təkcə son 24 saat ərzində Yakutiyada yanğınların söndürülməsinə 193 ton su sərf olunub.

İyul ayında rayonda meşə yanğınları ilə bağlı vəziyyət daha da pisləşib. Xüsusilə irimiqyaslı yanğınlar Yakutiyanın Abyiski, Olekminski, Vilyuyski, Verxnevilyuyski və Verxoyansk vilayətlərində qeydə alınıb.

İyulun 20-də Yakutiyanın Verxnevilyuyski rayonunda yanğınların söndürülməsi üçün iki Be-200 amfibiya təyyarəsinin havaya qalxdığı bildirilib. Ərazidə baş verən yanğınları söndürmək üçün əlavə qüvvələr də cəlb olunub. Bölgədə güclü külək və anomal istilər müşahidə olunur.

Oxuməni.az