Sumqayıtda 2 nəfərin ölümü ilə nəticələnən yol qəzası baş verdi
Fövqəladə Hallar Nazirliyinin "112" qaynar telefon xəttinə daxil olmuş məlumata əsasən, Sumqayıt şəhərində "Slavuta" markalı minik avtomobili və "İsuzu" markalı sərnişin avtobusu toqquşmuşdur. Nəticədə "Slavuta" markalı minik avtomobili deformasiyaya uğramış, avtomobilin sürücüsü 1979-cu il təvəllüdlü Əhmədov Zaur Aqil oğlu və sərnişin Hüseynov Rasim Möhsün oğlu hadisə yerində vəfat etmişdir. Dərhal Fövqəladə Hallar Nazirliyinin müvafiq xilasetmə qüvvələri hadisə yerinə cəlb olunmuşlar. Xilasedicilər təhlükəsizlik qaydalarına riayət etməklə xüsusi alət və avadanlıqlar vasitəsilə deformasiyaya uğramış avtomobildə sıxılmış vəziyyətdə qalmış cəsədləri çıxararaq aidiyyəti üzrə təhvil vermişlər. Həmçinin ərazidə müvafiq təhlükəsizlik tədbirləri görmüşlər. Faktla bağlı müvafiq qurumlarda araşdırma aparılır.
O.M.
