Çexiyalı deputatlar Azərbaycanda keçiriləcək parlament seçkilərinə nəzarət edəcəklər

Çexiya-Azərbaycan Parlamentlərarası Dostluq Qrupu üzvlərinin şərəfinə Azərbaycanın Çexiyadakı səfirliyində ziyafət təşkil edilib.

Azərbaycanın Çexiyadakı səfirliyindən verilən məlumata görə, ziyafətdə Çexiya Parlamentinin Deputatlar Palatasının sədri, Çexiya-Azərbaycan Parlamentlərarası Dostluq Qrupunun sədri Yan Hamaçek və parlamentin digər üzvləri iştirak ediblər.

Tədbirin giriş hissəsində Azərbaycanın Çexiyadakı fövqəladə və səlahiyyətli səfiri Fərid Şəfiyev və Y. Hamaçek çıxış ediblər.

Səfir F. Şəfiyev çıxışı zamanı Çexiya-Azərbaycan münasibətlərinin müxtəlif istiqamətləri, inkişaf etməkdə olan siyasi və iqtisadi əlaqələr, habelə iki ölkə rəsmilərinin qarşılıqlı səfərləri haqqında söhbət açıb. Səfir həmçinin noyabrın 1-də ölkəmizdə keçiriləcək parlament seçkilərini izləmək üçün Çexiya parlamentinin üzvlərinin ibarət nümayəndə heyətinin Azərbaycana səfər edəcəyini bildirib.

Çexiya parlamentinin Deputatlar Palatasının sədri Y. Hamaçek isə ölkəsinin Azərbaycanla əməkdaşlığa xüsusi önəm verdiyini qeyd edib, bu əməkdaşlığın dərinləşməsinə ümid etdiyini vurğulayıb.

Mediainfo.az