Bu gün "Eurovision 2011"in final günüdür!
Bu gün Almaniyanın Düsseldorf şəhərində "Eurovision-2011" Beynəlxalq Mahnı Müsabiqəsinin finalıdır. Finalçıların çıxış ardıcıllığı püşkatma yolu ilə müəyyənləşib.
İlk olaraq səhnəyə finlandiyalı müğənni Paradis Oskar çıxacaq. Daha sonra
Bosniya və Herseqovinadan olan Dino Merlin səhnəni bölüşəcək. Digər ölkələrin
çıxış ardıcıllığı isə belədir: Danimarka, Litva, Macarıstan, İrlandiya, İsveç,
Estoniya, Yunanıstan, Rusiya, Fransa, İtaliya, İsveçrə, Böyük Britaniya,
Moldova, Almaniya, Rumıniya, Avstriya, Azərbaycan, Sloveniya, İslandiya,
İspaniya, Ukrayna, Serbiya, Gürcüstan. Azərbaycan təmsilçiləri Eldar
Qasımov və Nigar Camal səhnəyə 19-cu sırada çıxacaqlar. Onlar "Running Scared"
mahnısını ifa edəcəklər.
Müsabiqənin şərtlərinə görə, qalib bütün iştirakçı ölkələrdə sms və telefon
zəngləri vasitəsilə tamaşaçı səsverməsi nəticəsində müəyyənləşir. Tamaşaçılar
öz ölkələrini təmsil edən ifaçılara səs verə bilməzlər. Tamaşaçılarla
yanaşı, səsvermədə peşəkar münsiflər heyəti (hər bir ölkədən musiqi sahəsində
beş peşəkar) iştirak edir. Münsiflər və tamaşaçıların səsləri yarıbayarı
toplanır. Beləliklə, ümumi xal əldə olunur və ölkələrə verilir.
Azərbaycanda tamaşaçılar müsabiqə günü canlı ifa zamanı bəyəndiyiniz ölkənin
çıxış nömrəsini yazıb istənilən mobil operatordan 9450 sms nömrəsinə göndərə
bilərlər. 1 SMS-in qiyməti 60 qəpikdir. 9450 sms nömrəsi yalnız Azərbaycandan
səs vermək üçündür. Hər ölkənin sms nömrəsi yayımçı televiziyadan elan olunur.
Ölkəmizdən Azərbaycan təmsilçilərinə səs verə bilmərik. Azərbaycan
təmsilçilərinə yalnız xarici ölkə ərazisindən səs vermək olar. 1 nömrədən 20
səs göndərmək mümkündür. Final mərhələsində çıxış edəcək ölkələrin kodu sıra
nömrələri ilə eynidir.
"Eurovision" mahnı müsabiqəsi 1956-cı ildən keçirilir. Müsabiqənin keçirilmə
yeri əvvəlki ildə qalib gələn ifaçının təmsil etdiyi ölkə olur.
İştirakçı ölkələrin sayı çox olduğundan, təsnifat mərhələsi iki yarımfinalda
keçirilir. Müsabiqəyə ev sahibliyi edən ölkə, eləcə də "Eurovision"un "böyük
beşliyi" - Böyük Britaniya, Almaniya, Fransa, İspaniya, İtaliya mübarizəyə
birbaşa finaldan qoşulur.
Qoy layiq olan qazansın. Təmsilçilərimiz layiqli çıxış etsinlər. Məntiqi nəticəni özünüz çıxarın...
Günel Həbib
O.M.