Emin Ağalarov: "Qayınatam prezident olmasaydı da..."

Emin Ağalarov: "Qayınatam prezident olmasaydı da..."

7 Avqust 2013 09:48
1 378
Bəyəndim (0) Bəyənmədim (0)
Ağalarov aldığı "ən ekstravaqant" əşyanın Harley Davidson motosikleti olduğunu qeyd edib

Çərşənbə axşamı Londonun Metro qəzetində nəşr olunan müsahibəsində Emin Ağalarov Bakıda keçirilən "Eurovision" mahnı müsabiqəsində çıxış etməsindən, aldığı ən bahalı əşyadan və Dünya Gözəli müsabiqəsinə yanaşmasından danışıb."Eurovision"un intervalında çıxış etmək "gözəl təcrübə olsa da, karyeramı başlamaqda rolu olmayıb", - deyə cənab Ağalarov bildirib.
"Bəzi adamlar deyir ki, bu çıxış imkanını sizə prezidentin kürəkəni olduğunuza görə veriblər. Bunun rolu olubmu?" sualına cavab olaraq isə o deyib ki, bu çıxış Azərbaycanda "ən böyük sənətçi" olmasının "rasional, məntiqli" nəticəsi idi: "Mən Azərbaycanda ən böyük sənətçiyəm. Əgər qayınatam prezident olmasaydı da, mən bütün hallarda orada ("Eurovision" müsabiqəsində) olacaqdım. İki interval oldu, mən onlardan yalnız birində çıxış etdim. Mənim orada iştirakım rasional və məntiqli idi".

Emin Ağalarov hazırda Amore adlı yeni mahnısını təqdim etmək üçün Britaniyadadır və mahnının klipində "Dünya Gözəli 2012" seçilmiş Olivia Culpo çəkilib.

Müsahibədə həmçinin Dünya Gözəli müsabiqələri və Olivia Culpo-nun klipdə çəkilməsi barədə danışılır: "O, möhtəşəm və çox dəstəkləyici insandır. O, klipdə çəkildi və onu təbliğ etmək üçün Rusiyaya gəldi. Gələn Dünya Gözəli müsabiqəsi Moskvada keçiriləcək deyə bu, məntiqlidir."

Eyni zamanda qeyd olunur ki, bu müsabiqə cənab Ağalarova məxsus olan məkanda keçiriləcək.

Gözəllik müsabiqələrinin "mübahisəli" olması barədə fikirlərə münasibət bildirən müğənni deyir ki, Dünya Gözəli müsabiqəsinin "mükəmməl reputasiyası var".

"Gözəllik müsabiqəsinə qarşı necə etiraz etmək olar? Əminəm ki, etirazlar heç baş verməyəcək. Belə bir şeyin baş verməsi barədə heç eşitməmişəm."

Potensial etirazçıların həbsilə bağlı isə cənab Ağalarov deyir ki, bu, onların "necə etiraz etdiyindən asılıdır".

"Göztərişə uyğun olaraq etiraz etsələr zənn edirəm ki, həbs olunmayacaqlar, pəncərələri qırsalar, zənn edirəm ki (həbs) olunacaqlar. Müsabiqə Britaniyada keçirilsəydi də belə olardı - hər şey ölkədən asılıdır."

Emin Ağalarov həmçinin aldığı "ən ekstravaqant" əşya barədə sualı cavablandıraraq bunun Harley Davidson motosikleti olduğunu qeyd edib. "O qədər çox ekstravaqant alışlar etmirəm".

O.M.