Müsavat partiyasının VIII qurultayı Bakıxanov, Əmircan və ya Maştağa qəsəbələrində keçirilə bilər

Müsavat partiyasının VIII qurultayı Bakıxanov, Əmircan və ya Maştağa qəsəbələrində keçirilə bilər

30 Mart 2012 18:08
665
Bəyəndim (0) Bəyənmədim (0)

Bakı Şəhər İcra Hakimiyyəti (BŞİH) Müsavat Partiyasının VIII qurultayının keçirilməsi ilə bağlı partiyanın müraciətini cavablandırıb. Bakı Şəhər İcra Hakimiyyətinin ictimai-təşkilatlar və siyasi partiyalarla iş şöbəsinin müdiri Zaur Ramazanov bildirib ki, Müsavat Partiyası qurultayın keçirilməsi üçün əvvəlcə Bakı İdman Sarayı (keçmiş Əl Oyunları İdman Sarayı) sonra isə Opera və Balet Teatrını istəyib: "Bakı İdman Sarayında "Evrovizion" musiqi yarışmasının seçim turunun keçirilməsi ilə əlaqədar partiyanın həmin tədbirinin keçirilməsinə razılıq vermək mümkün olmayıb. Digər tərəfdən, qurultay və konfrans kimi tədbirlərin adıçəkilən kompleksdə keçirilməsi qəbul edilən təlimata uyğun deyil".

Z. Ramazanov qeyd edib ki, paytaxt meriyası budəfəki cavabında da Müsavat Partiyasına icra hakimiyyətinin əvvəlcədən açıqladığı məkanlarda qurultay keçirilməsi ilə bağlı tövsiyəni partiyanın diqqətinə çatdırıb: "Partiyanın diqqətinə çatdırılıb ki, Opera və Balet Teatrı Mədəniyyət və Turizm Nazirliyinin balansında olduğundan, məsələ əvvəlcə onlarla razılaşdırma aparılmalıdır".
Müsavat Partiyası başqanının müavini Gülağa Aslanlı da açıqlamasında məktubun arıq partiyaya daxil olduğunu bildirib: "Məktubda bildirilib ki, Opera və Balet Teatrı Mədəniyyət və Turizm Nazirliyinin tabeliyindədir. Bu səbəbdən də orada tədbirin keçirilməsi üçün həmin teatrdan müvafiq razılaşma əldə etdikdən sonra meriyaya müraciət edə bilərsiniz".
G.Aslanlı qeyd edib ki, BŞİH-nin bu cavabını irəliyə doğru addım kimi dəyərləndirirlər: "Növbəti həftənin birinci günündən Opera və Balet Teatrının rəhbərliyi ilə görüşməyə çalışacağıq". G.Aslanlı deyib ki, paytaxt meriyasının təklif etdiyi Bakıxanov qəsəbəsi Adil İsgəndərov adına Mədəniyyət Evində, Əmircan və Maştağa qəsəbələrindəki eyni təyinatlı mədəniyyət saraylarında qurultay keçirmək niyyətində olmamalarına səbəb adıçəkilən müəssisələrdə oturaq yerlərinin azlığıdır: "Bu məsələdə başqa məqsədimiz oxdur".
Qeyd edək ki, Müsavat Partiyası qurultayın keçirilməsinə yer ayrılması üçün bir müddət öncə Bakı Şəhər İcra Hakimiyyətinə müraciət edib. Həmin müraciətdə martın 3-4-də keçirilməsi planlaşdırılan qurultay üçün Bakı İdman Sarayının ayrılması istənilib. Paytaxt meriyası isə müraciətə rədd cavabı verib. Bundan sonra isə Müsavat Partiyası martın 3-4-də keçirməyə hazırlaşdığı qurultayı qeyri-müəyyən vaxta təxirə salıb.

O.M.