EuroNest Parlament Assambleyasının plenar iclası Bakıda keçiriləcək
Azərbaycanın EuroNest Parlament Assambleyasındakı nümayəndə heyətinin rəhbəri Elxan Süleymanovun məlumatına görə, Azərbaycan EuroNest Parlament Assambleyasının Bakıda keçiriləcək plenar sessiyasına tam hazırdır. Azərbaycan nümayəndə heyəti buna çox ciddi hazırlaşır. Bu sessiya çox uğurla başa çatdırılacaq və Azərbaycan üçün yaddaqalan tarixi hadisə olacaq. E.Süleymanov həmçinin bildirib ki, sessiyanın Bakıda keçirilməsi Azərbaycan üçün çox böyük siyasi uğurdur: "Biz buna asanlıqla nail olmamışıq. Azərbaycan nümayəndə heyəti uzunmüddətli iş aparıb və biz buna səsvermə nəticəsində nail olmuşuq".
Bakıda keçiriləcək plenar sessiya çərçivəsində 4 komitənin
- Demokratiya və siyasi komitə, Sosial komitə, Enerji təhlükəsizliyi komitəsi və
İqtisadi komitənin iclasları keçiriləcək. Bu komitələrin ilkin məruzələri
yanvar ayında müzakirə edilib və bütün qərarlar aprel sessiyasında qəbul
olunacaq.
E.Süleymanov sessiyada Ermənistan nümayəndə heyətinin
iştirakı barədə sualı da cavablandırıb. O qeyd edib ki, Ermənistan nümayəndə
heyəti üzvlərinin təhlükəsizliyi tam təmin olunacaq və onlar bu tədbirə qatıla
bilər: "Biz Ermənistan nümayəndə heyətinə onların təhlükəsizliyinin təmin
olunacağı barədə rəsmi məktub göndərmişik".
Xatırladaq ki, EuroNest Parlament Assambleyasının plenar
sessiyası aprelin 2-4-də Azərbaycan paytaxtında keçiriləcək.
O.M.