Səfir: Azərbaycana qarşı tənqid saxta və mütəşəkkildir

Azərbaycana qarşı tənqid saxta və mütəşəkkildir.

Trend-in məlumatına görə, bunu Azərbaycanın Belçikadakı səfiri Fuad İsgəndərov "Euroactiv" saytına müsahibəsində deyib.

Diplomat qeyd edib: "Biz Avropaya nə qədər yaxınlaşırıqsa, bir o qədər də tənqid eşidirik. Bu cəhdlərin arxasında kimlərin dayandığını bilirik".

F.İsgəndərov bildirib ki, hər iki tərəf - Azərbaycan və Avropa daha sıx münasibətlərin olmasını istəyir: "Azərbaycan Avropa bazarına nə qədər yaxın olsa, tərəflər üçün həm iqtisadi, həm də siyasi baxımdan daha yaxşı olar".

Səfir əlavə edib ki, bununla belə, daim münasibətlərin inkişafına mane olmağa çalışan bir sıra qüvvələr var:

"Biz 2017-ci ilin fevralında strateji tərəfdaşlıq haqqında yeni saziş üzrə danışıqlara başlamışıq və bu qısa müddət ərzində 5 danışıqlar raundu keçirmişik".

O deyib ki, bəzi qüvvələr Azərbaycanla Avropa İttifaqı arasında münasibətlərin inkişafına və ya ən azı, bir sıra siyasi qərarların qəbul edilməsinə mane olmaq üçün süni tənqiddən istifadə edirlər.