Vəkil: “Lapşin adlar çəkib, onlar bir qrup olublar”

Azərbaycanın ərazi bütövlüyünün parçalanmasına çağırışlar etməkdə, sərhədi pozmaqda ittiham olunan bloqçu Aleksandr Lapşinin vəkili onunla görüşüb.

Vəkil Səfər Hüseynov açıqlamasında bildirib ki, Lapşinlə onun müdafiəsinin gələcək planları haqda danışıblar: "Lapşin hələ ki, mənim vəkil kimi qalmağımı istədi və beləcə davam edəcək. O, üç ölkənin – Ukrayna, Belarus və İsrailin vətəndaşıdır. Gələcəkdə özünə əlavə vəkil tutub-tutmayacağını bilmir. Faktiki olaraq hələ ki, vəkili mənəm. Başqa ölkədən kimsə gəlib ona burada vəkillik edə bilməz. Dünən və bu gün onunla görüşmüşəm. Bütün günü yanında olmuşam".

S.Hüseynov bildirib ki, hələ Lapşinin ailə üzvləri və ya yaxınlarından Azərbaycana gələn olmayıb: "Onunla başqa heç kim görüşməyib, səfirliklərin nümayəndələri belə..."

A.Lapşin istintaqa ifadə verib və ittiham üzrə özünü qismən təqsirli bildiyini deyib:

"Öz yazdığı məqalələri təsdiqləyib, ora getdiyini, Qarabağa keçdiyini etiraf edib. Özünü qismən təqsirli bilir. Ona dəstə tərəfindən törədilən cinayət ittihamı verilib. Onlar bir qrup adam olublar. Həmin adamlar haqda da ifadə verib. Deyib ki, bu adamlar vasitəsilə getmişəm, adlarını çəkib, amma soyadlarını bilmir".

Səhhəti normaldır, saxlanma şəraiti də yaxşıdır, narazılığı yoxdur. Karantin olduğu üçün hazırda tək saxlanılır".

S.Hüseynov qeyd edib ki, A.Lapşin barəsində həbs qətimkan tədbiri seçilməsi qərarının dəyişdirilməsi üçün vəsatət verməyəcəklər.

Mediainfo.az