Odla oynayan qonşu: Azərbaycana narkotika, ermənilərə benzin...

Odla oynayan qonşu: Azərbaycana narkotika, ermənilərə benzin...

12 Sentyabr 11:18
112
Bəyəndim (0) Bəyənmədim (0)

Yenə də internet resursları İrana məxsus maşınların Qarabağa naməlum yüklər daşıması barədə kadrlarla dolub-daşır.

Hansı ki, iyulun 11-dən avqustun 8-dək İrana məxsus 4 ağırtonnajlı (TIR) yük maşınları, 31 benzin daşıyan yük maşını Laçın dəhlizindən keçib Xankəndiyə gəlmişdi (üst-üstə 70 reys!) və rəsmi Bakı buna görə Tehrana nota vermişdi. Amma görün, ardınca nə baş verib: notaya “cavab” olaraq Tehran elə növbəti gündən başlayaraq erməni terrorçularına yükdaşımaları intensivləşdirib. Daha 58 yük maşını qanunsuz olaraq Azərbaycan ərazilərinə daxil olub və yük gətirib. Bəzi yüklərin yanacaq-sürtgü məhsulları olduğu iddia edilir.

Qarabağ erməniləri “su” deyib “mələdiyi” üçün Rusiya sülhməramlıları onlara 200 ton su daşıdığını deyir. Yoxsa İran ermənilərə içmək üçün daşıyırmış benzini... Qarabağda bir ovuc erməni var, onlar bu qədər yanacağı neynirlər? Deməli, müsəlman qonşumuz erməni terrorçularının “yeni müharibəyə hazırlıq” prosesində yer alıb, bunun başqa adı ola bilməz! Bu, həm də onu bir daha təsdiqləyir ki, 44 günlük müharibə dövründə İrandan Ermənistana silah-sursat və digər hərbi ləvazimatların daşındığı barədə yayılan məlumatlar həqiqət imiş!

Səsimi eşitsəydi, dilimi anlasaydı, İrana 5-6 kəlməlik müraciət edərdim. Təxminən belə...

Axı, Şuşa sənin vasitəçiliyinin qurbanı olub, İran! Nə tez unutdun! O zaman Azərbaycan və Ermənistan rəhbərliyini Tehrana çağırdın ki, gəlin məsələni həll edək, mən də olum bu danışıqların ağsaqqalı! Ermənistan və onun böyüyünün neylədiyini unudubsan bəlkə? Elə Tehran görüşü davam edən vaxt o yandan Ter-Petrosyana, bu yandan Yaqub Məmmədova zəng etdilər ki, bəs, durun, gəlin daha, Şuşa işğal olunub!

Əslində bu, sənin, sən İranın vasitəçiliyinə zərbə idi, həm də sənin cəzalandırılmağın, bir dövlət kimi hörmətdən salınmağın idi! Məntiqlə, bunun cavabını istəməliydin, hesab sormalıydın. Ki, məni niyə uşaq-muşaq yerinə qoydunuz, imicimi ləkələdiniz, müsəlman qonşumun gözündən saldınız?!

Amma sən neylədin? Özün yaxşı bilirsən! Ter-Petrosyan etiraf etmişdi, İran Mehri nəfəsliyini bağlasa, Ermənistan boğular. Sən nəinki bu canilərin “nəfəsliyi”ni bağlamadın, əksinə, Qarabağı işğal edən, məscidlərdə donuz (!) saxlayan Ermənistana nəinki nəfəsliyi bağlamadın, hətta fəlakətli durumda olan, tez-tez reanimasiyaya düşən işğalçıya, terrorçuya süni nəfəs verdin, onu tənəffüs aparatına qoşdun. Axı, “İslam torpağı” deyirdin Qarabağa, necə oldu bu torpağı donuzların murdarlamasına razılaşdın?!

Adında “İslam” yazılan dövlət “halal-haram” bilmədən daşıtdırdı müsəlman qonşusunun sərvətlərini. Arazın bu tayından, kəsə yolla daşıdılar, evlərimizin daşınadək, doğranan çinar, qoz ağaclarınadək...

İslamda qəbirə toxunmaq günah sayılır. Ermənilər Qarabağdakı qəbirlərimizi qazıb, qızıl diş axtardılar 30 il ərzində. Bir dənə salamat qəbristanlıq, bir dənə sağ qəbir qalmadı. Hətta səngərlərini iki bacının məzarları arasından qazmışdılar, heyrət doğuran foto idi. Şəhər boyda olan Qarağacı qəbristanlığında nişanə tapa bilmədi ağdamlılar! Bu illərdə erməni işğalına stimul, hər cür dəstək verənlərdən biri də məhz müsəlman İran dövləti oldu!

Bakupost.az - Qarabağda ermənilər tərəfindən dağıdılmış qəbiristanlıqlar -  İran nəşrinin reportajı

Ermənistan Qarabağda salamat məscid qoymadı. Amma İran gözü qarşısında dağıdılan məscidlərə susdu. Azərbaycan Prezidenti dəfələrlə müsəlman ölkələrinə çağırış etdi: “Məscid dağdan Ermənistanla əlaqə qurmayın!” Əvəzində İran özünün mütəxəssislərini yolladı Şuşaya, Aşağı Gövhər Ağa məscidini təmir etməyə! Müsəlman qardaşa bundan artıq pislik ola bilməzdi. Qarabağda 100-dən artıq məscidi yer üzündən silən erməninin üzünə tüpürmək əvəzinə, İran Şuşada “fars məscidi” yarlığının qoyulması naminə utanc gətirən bir bazarlığa getdi. Necə ki, bundan öncəki bazarlıq İrəvandakı Göy məsciddə yapılmışdı...

Biz illər boyu Xurşidbanu Natəvanın, Üzeyir Hacıbəylinin, Bülbülün heykəllərinin güllələnməsinə reaksiya istəmirdik e, deyirdik heç olmasa məscidlərin təhqir olunmasına qarşı çıx! Amma kimə deyirsən?

İşğal günlərində baxırdıq İran-Ermənistan ticarət əlaqələrinə, prezidentlərin qucaqlaşma səhnələrinə, tüstümüz təpəmizdən çıxırdı. Axı, heç bir məntiqə sığmırdı, bir İslam ölkəsilə islam və insanı dəyərlərə tüpürən, insanları diri-diri yandıran, torpağa gömən, hamilə qadınların qarnındakı körpəni süngüyə keçirən caniləri necə qucaqlamaq olardı?! Amma sən qucaqlayırdın. Bu qucaqlaşma Ter-Petrosyanla da oldu, Robert Köçəryanla da, Serj Sərkisyanla da, elə Nikol Paşinyanla da. Yəni sənin qucaqlamadığın erməni qalmadı, İran! Paşinyan o qədər arxayıncasına Tehrana səfər etmişdi ki, orda “Qarabağ Ermənistanındır”, yazılmış plakat qaldırmışdı İran ermənilərilə görüşdü. Di gəl, İranda yaşayan 40 milyondan artıq Azərbaycan türkü “mən türk dilində təhsil almaq istəyirəm” şüarı ilə meydana çıxanda dərhal belinə yarlıq yapışdırıb, Evin zindanına yollayırsan! Bəlkə səhv edirəm? De, görüm İran həbsxanalarında neçə erməni və neçə azərbaycanlı var. Özü də bu dövlətin başında dayanan hər kəs seçki kampaniyası vaxtı azərbaycanlılar qəhrəmandır, İran tarixində mühüm rol oynayır, deyirlər. Qəhrəmanına bir ovuc erməni qədər hörmət bəsləmədin bu illərdə...

Prezident İlham Əliyev dəfələrlə işğalçı Ermənistana dəstək verənlərə kəskin etirazını bildirib. Elə Şuşaya ilk səfərində də sözünü demişdi.

Sitat: “Onlar görüntü yaratmaq üçün Yuxarı Gövhərağa məscidini guya bir xarici şirkətlə birlikdə təmir etdiriblər. Bu təmir bizə lazım deyil. Bu təmir riyakarlıq rəmzidir, sadəcə olaraq, görüntü yaratmaqdır ki, guya Ermənistan rəhbərliyi məscidləri təmir etdirir. Əfsuslar olsun ki, bir ölkənin şirkəti bu çirkin əməllərdə onlarla şərik olub”.

Prezident açıq danışmışdı: “Ermənistan müsəlman ölkələri üçün dost ola bilməz, məscidləri bu günə qoyan ölkə müsəlman ölkələri ilə dost ola bilməz. Bu, riyakarlıqdır və Ermənistanı dost ölkə kimi qəbul etmək də riyakarlıqdır, allahsızlıqdır. Bunu dağıdanla müsəlman ölkələrinin liderləri necə dost ola bilərlər?”

Bu, Ermənistanın planlarında iştirak edənlərə tərs şillə idi! İran Ermənistanla dost olanların önündə getdi bu illərdə, çox təəssüf!

Özü də çox qəribədir, İran ABŞ-ı, Vaşinqton da Tehranı “düşmən” adlandırır, bir-birinin qanını içməyə hazırdırlar. Amma Azərbaycanın öz torpaqlarını azad etməsinə nə ABŞ, nə də İran sevindi. Zəngəzur tərəfdə gərginlik olanda həm ABŞ-ın, həm də İranın İrəvandakı səfirləri ərinməyib, sərhədə qədər gəldilər, Azərbaycan tərəfə boylanıb, getdilər. İran bəyan etdi ki, Ermənistanın sərhədləri Tehran üçün “qırmızı xətt”dir. Qırmızı xətt e...Yaxşı, bu İran anlamırmı ki, Azərbaycanın sərhədləri də özü üçün qırmızı xəttdir, onda İran TIR-ları nə sülənir bizim torpaqlarda?! Deyək ki, Laçın dəhlizi rus sülhməramlılarının nəzarətindədir, faktiki olaraq açıqdır, bəs, sən nə haqla mənim ərazimə daxil olursan? Məscid misalı...Bir Azərbaycan vətəndaşı, hələ TIR-lı demirəm, sənin ərazinə iznsiz daxil ola bilərmi?!

Bu yerdə zəruri xatırlatma: İran TIR-ları Qarabağ tərəfdən sərhədlərimizi pozur, qaçaqmalı daşıyır, digər istiqamətlərdən də İran qaçaqmalçıları ölkəmizə narkotika daşıyırlar. Elə iki gün qabaq Azərbaycan-İran sərhədinin Horadiz istiqamətində silahlı insident oldu, 1 nəfər yaralı - 11 kiloqram 770 qram narkotikla - ələ keçdi, 2 qaçaqmalçı qaçdı.

Mayın 15-də Yardımlı rayonunun Gendərə kəndi yaxınlığındakı sərhəd zastavasının xidməti sahəsində 3 nəfər naməlum şəxs, sərhəd naryadına qarşı odlu silahdan atəş açmışdı, nəticədə baş leytenant Eyvazov Samir Elmar oğlu və kiçik gizir Alimov Fərid Elçin oğlu şəhid oldular! Və hadisə yerindən 10 kq narkotik maddə aşkarlandı. İyul ayında Cəlilabad ərazisinə 5 nəfər naməlum şəxs daxil olmaq istəyənlər avtomat silahla (!) müqa­vimət göstərib, sərhədçilərin həyatına qəsd etmişdilər. Yenə də xeyli miqdarda narkotika...

Bu, faktiki olaraq İranın Azərbaycana qarşı müharibəsidir: narkotika müharibəsi! Yəni bu boyda dövlət sərhədlərinə nəzarət edə bilmir ki, narkotika qaçaqmalçıları avtomatla üstümüzə gəlir? Azərbaycan bu il az qala ermənilərlə döyüşdə verdiyi itkilər qədər itki verib İranla sərhəddə! Hansı qənaətə gəlirik: İran ermənilərə benzin, digər zəruri mallar, Azərbaycana isə narkotika göndərir! Hər iki göndərdiyi ilə qəsdimizə yönəlib!

Bir neçə gün əvvəl Azərbaycan Gorus-Qafan magistralını bağlayanda İranın “təzyiqi” qalxmışdı. Bakı xoş məram nümayiş etdirdi, əvəzində TIR-lar yolladı qanunsuz olaraq. Yəqin ki, bu özbaşınalıq cavabsız qalmayacaq. Gorus-Qafan magistralında İran maşınlarının dayandırılması bəlkə də mümkün olmayacaq, bəhanə edəcəklər ki, Ermənistana aparırıq. Azərbaycana qarşı sayğısız davranışların birinci cavabı Laşından başlanacaq, çox güman ki. Nə Ermənistan, nə Rusiya imzalarına hörmət qoymadı, nə də müsəlman İran qonşuluğa xətir qoydu. Laçın dəhlizində Azərbaycan əsgəri dayanmasa, ölkəmizə qarşı xain planlar azalmayacaq, əksinə, artacaq...Günün birində İran TIR-ının üstünə Şuşadan bir daş düşsə, bunun günahı kimdə olacaq?..İran odla oynayır, əks təqdirdə yanacaq daşıyan maşınları qanunsuz olaraq Laçın dəhlizində sıralamazdı...Musavat.com