Karlos Qonun Yaponiyadan qaçmasının detalları məlum olub

Yaponiya kütləvi-informasiya vasitələri “Nissan” şirkətinin direktorlar şurasının sabiq sədri Karlos Qonun ölkəni gizli yolla tərk etməsinin detallarını açıqlayıb.

Oxumeni.az NHK telekanalına istinadla xəbər verir ki, içərisində K.Qonun olduğu güman edilən baqaj “Kansay” beynəlxalq aeroportunda introskopla müvafiq yoxlamadan keçməyib. Bildirilir ki, VIP şəxslərin şəxsi təyyarələrinin baqajı təyyarə kapitanının razılığı ilə bir çox hallarda yoxlamadan keçmir. Bundan əlavə, Osakadan İstanbula uçan təyyarənin göyərtəsində interoskopa yerləşmədiyinə görə yoxlamadan keçməyən böyük baqaj olduğu da təsdiq edilib.

NHK telekanalı şahidlərə istinadla təyyarənin göyərtəsində hündürlüyü bir metrdən çox bir neçə baqajın olduğu barədə məlumat yayıb ki, K.Qonun da onlardan birinin içərisində qaçdığı güman edilir.

Xatırladaq ki, “Nissan” şirkətinin direktorlar şurasının sabiq sədri K.Qon 2018-ci ilin noyabrında öz gəlirlərini vergidən gizlətmək ittihamı ilə həbs edilib. Onun 2010-2017-ci illərdə bu yolla təqribən 71 milyon dollar gəliri vergidən yayındırdığı bildirilir. Bundan əlavə, K.Qonun fərdi investisiyaları zamanı dəymiş zərəri şirkətin hesabına ödədiyi də güman edilir.

Ötən ilin yazında onun vəkilləri 15 milyon dollar girov müqabilində K.Qonun ölkəni tərk etməmək şərti ilə azadlığa buraxılmasına nail ola biliblər. 2020-ci ilin aprelində keçirilməsi planlaşdırılan məhkəmə iclasınadək onun Yaponiyanı tərk etməsi qadağan olunsa da, K.Qon dekabrın 30-da Livana qaça bilib.

K.Qonun qaçışının tam təsvirini yaradan NHK telekanlının məlumatına əsasən, o, dekabrın 29-da Tokionun mərkəzindəki evindən çıxıb. Onun həmin gün saat 23 radələrində “Kansay” aeroportundan şəxsi təyyarə ilə Yaponiyanın tərk etdiyi bildirilir. Həmin təyyarə dekabrın 29-da səhər Dubaydan Osakaya gəlib. K.Qonun yerli vaxtla səhər saat 5-də İstanbula çatdığı, saat yarımdan sonra oradan başqa şəxsi təyyarə ilə Livana uçduğu qeyd edilir.

Yanvarın 4-də Türkiyə məhkəməsi K.Qonun qaçışı ilə bağlı beş nəfərin həbsi barədə order verib. Həmin şəxslərə qarşı insanların qeyri-qanuni daşınması ittihamı irəli sürülüb. Bununla yanaşı, Livan tərəfi K.Qonun ölkəyə qanuni yolla gəldiyini bildirir.

Hazırda Yaponiya polisi K.Qona ölkəni tərk etməyə yardım göstərən şəxsləri axtarır. Bu məqsədlə onun evində axtarışlar da təşkil edilib.

İlkin ehtimallara görə, K.Qona ABŞ-a və Livana məxsus iki mühafizə şirkətinin yardım etdiyi bildirilir.

© Materiallardan istifadə edərkən hiperlinklə istinad olunmalıdır

Oxumeni.az