Sağlamlıq imkanları məhdud uşaqları övladlığa götürən şəxslərə ayda 480 manat ödəniləcək

Sağlamlıq imkanları məhdud uşaqları övladlığa götürən şəxslərə ayda 480 manat ödəniləcək

23 Sentyabr 13:53
1 930
Bəyəndim (2) Bəyənmədim (0)

Əmək və Əhalinin Sosial Müdafiəsi Nazirliyi tərəfindən övladlığa götürülmə ilə bağlı hazırlanan təkliflər qəbul olunarsa, onlar 2021-ci ilin yanvar ayından qüvvəyə minəcək və geriyə şamil olunmayacaq.

Oxuməni.az-ın verdiyi xəbərə görə, bunu Əmək və Əhalinin Sosial Müdafiəsi Nazirliyinin Sosial Xidmətlər Agentliyinin Övladlığagötürmə və valideyn himayəsindən məhrum olmuş uşaqlarla iş departamentinin müdiri Cavid Şahmalıyev bildirib.

Onun sözlərinə görə, Əmək və Əhalinin Sosial Müdafiəsi Nazirliyi tərəfindən övladlığa götürmə ilə bağlı stimulılaşdırma proqramı tərtib edilib. Bu proqrama əsasən, 18 yaşadək sağlamlıq imkanları məhdud uşaqları övladlığa götürən şəxslərə 480 manat aylıq müavinətin ödənilməsi təklif edilib:

“Sağlamlıq imkanları məhdud uşaqların indiyədək övladlığa götürülməsi praktikası olmayıb. Buna görə də belə uşaqları övladlığa götürən şəxslərə müavinətin ödənilməsi təklif edilib. Amma bu, hələ layihədir. Bunun üçün “Sosial müavinətlər haqqında” qanuna dəyişikliklərin edilməsi təklif olunub”.

C.Şahmalıyev qeyd edib ki, çox zaman 3 yaşdan yuxarı uşaqlar övladlığa götürülmür. Buna görə də 3 yaşdan yuxarı uşaqların bir qismi müəssisələrdə qalır. Ona görə də belə uşaqları övladlığa götürən şəxslərə 160 manat aylıq müavinətin ödənilməsi təklif edilib.

Agentlik rəsmisi bu uşaqların təhsil, səhiyyə xərclərinin dövlət tərəfindən qarşılanmasının təklif edildiyini də açıqlayıb.

Oxuməni.az