Bakıda qədim sürüşmə zonası atmosfer çöküntülərindən aktivləşdi
Bakının Xətai rayonu Nəsrəddin Tusi-Gəncə prospekti arasındakı yamacda qədim sürüşmə sahəsində aktivləşmə müşahidə edilib. Sürüşmə prosesləri həmin ünvanda olan 11, 11 a, 11 b və 13 saylı binaların arasında yerləşir.
Ekologiya və Təbii Sərvətlər Nazirliyinin (ETSN) Kompleks Hidrogeologiya və Mühəndis
Geologiyası Ekspedisiyasının baş mühəndisi Şaiq Niftiyev bildirir ki, son aylarda
atmosfer çöküntülərinin miqdarının artması nəticəsində həmin ərazidə
dayanıqlığını itirmiş süxurlarda çökmə prosesləri intensivləşib, köhnə sürüşmə
qaşına paralel və onun boyunca irəliləyən yeni qırılma qaşı, çatlar yaradıb.
Çatın eni bəzi yerlərdə 20-40 santimetr, qalan hissələrdə isə 4-5 santimetr təşkil
edir. Çatın görünən dərinliyi 10-30 metr, bəzi yerlərdə isə 50 santimetrə
çatır.
Ş.Niftiyev deyib ki, həmin çatdan 8-10 metr yamac istiqamətində, aşağı doğru
növbəti çat müşahidə olunub: "Hər iki çat arasında sürüşmə kütləsinin 10-15
santimetr çökməsi baş verib. Hazırda sahədə müşahidə işləri davam etdirilir".
Ş.Niftiyev bildirib ki, ərazidə təcili tədbirlərin görülməsinə ehtiyac var:
"Sürüşmənin növbəti aktivləşməsinin qarşısı alınmalıdır. Sürüşmənin qaş hissəsində
yerləşən yaşayış evlərinin qarşısındakı bağ sahələri, qeyri-qanuni tikililər və
su xətləri ləğv edilməli, yaranmış çatlar və oyuqlar gillə doldurulmalıdır". Baş mühəndis onu da deyib ki, ərazidə
sürüşmə proseslərinin başlanması 1987-ci ilə təsadüf edir. 1988-ci ilin fevral
ayının 13-də isə ərazidə ilk sürüşmə baş verib.
O.M.