«Xüsusi təyinatlı yaşayış sahələrinin kirayə müqaviləsinin forması»na dəyişiklik edildi
Azərbaycan Nazirlər Kabineti "Xüsusi təyinatlı yaşayış sahələrinin kirayə müqaviləsinin forması"nın təsdiq edilməsi barədə" 2010-cu il 29 aprel tarixli qərarına dəyişikliklər edilməsi barədə qərar qəbul edib.
Qaçqınların və Məcburi Köçkünlərin İşləri üzrə Dövlət
Komitəsinin Ədliyyə Nazirliyi ilə razılaşdırılmış təklifini nəzərə alaraq qəbul
edilən qərarla "Xüsusi təyinatlı yaşayış sahələrinin kirayə müqaviləsinin
forması"na dəyişiklik edilib.
Nazirlər Kabinetindən verilən məlumata görə, dəyişikliklərə
əsasən, müvəqqəti məskunlaşdırılmış məcburi köçkünlər xüsusi təyinatlı yaşayış
sahələrində kirayə haqqı ödəmədən yaşayacaqlar. Müqavilə formasına kirayə
haqqının ödənilməsi ilə bağlı hissələrə "(müvafiq dövlət proqramları və ya tədbirlərinin
icrası və yardım layihələri əsasında müvəqqəti məskunlaşdırılmış məcburi
köçkünlər istisna olmaqla)" sözləri əlavə edilib.
Qərarda nəzərdə tutulan digər mühüm dəyişiklik məcburi
köçkünlərin xüsusi təyinatlı yaşayış sahəsində yaşamasına xitam verilməsini tənzimləyir.
Dəyişikliyə əsasən, müvəqqəti məskunlaşdırılmış məcburi köçkünlərlə kirayə
müqaviləsi kirayə verənin tələbi ilə məhkəmə qaydasında ləğv edilə bilər.
Kirayə müqaviləsi o zaman ləğv edilə bilər ki, kirayəçi və
ailə üzvləri yaşayış sahəsində fasiləsiz olaraq 3 aydan artıq müddətdə üzrlü səbəb
olmadan yaşamasın, bu sahədən yaşayış yeri kimi istifadə etməsin.
Bundan başqa, xüsusi təyinatlı yaşayış sahələrində məcburi
köçkünlərin yaşamasına o zaman xitam verilə bilər ki, kirayəçi və ailə üzvləri
qanuna uyğun olaraq öz vəsaitləri hesabına ayrıca yaşayış sahəsi (ev, mənzil) əldə
etsinlər. Amma bu, ayrı təsərrüfatın yaranması halına aid deyil.
O.M.