Bir gündə Bakı Metropolitenindən 600 min sərnişin istifadə edir
İş
günlərində Bakı Metropolitenindən təxminən 600 min sərnişin istifadə edir. Bunu
Bakı Metropoliteninin rəisi Tağı Əhmədov jurnalistlərə açıqlamasında deyib:
"Hazırda iş günləri ərzində imtiyazlı sərnişinlər də daxil olmaqla metrodan 600
minə yaxın sərnişin yararlanır ki, bu da Bakı əhalisinin 35-37 faizi deməkdir.
Ümidvaram ki, gələcəkdə bu say artacaq", - deyə T.Əhmədov bildirib.
Qeyd edək ki, bu ilin sentyabr ayı ərzində Bakı Metropolitenindən 15,2 milyon
və ya avqust ayına nisbətən 25,6% çox sərnişin yararlanıb. Cari ilin
yanvar-sentyabr aylarında isə metrodan 132,4 milyon nəfər istifadə edib ki, bu
da ötən ilin analoji dövrünə nisbətən 0,3% çoxdur.
Xatırladaq ki, 2011-ci ilin ötən dövrü ərzində Bakı metropolitenində sərnişin
daşımasının həcmində ilk dəfədir ki, artım qeydə alınır.
T.Əhmədovun
sözlərinə görə, hazırda metronun "Məşədi Əzizbəyov" stansiyası yenidən qurulur:
"Ümumiyyətlə, metropolitendə tikinti və yenidənqurma işləri dayanmadan davam
etdirilir. Vəsaitdən asılı olaraq gələcəkdə "28 May" stansiyasında eskalator
zolaqlarının sayı 4-ə çatdırılacaq ki, hazırda bu istiqamətdə Almaniyanın
"Tisson" şirkəti ilə danışıqlar aparılır. Ümumiyyətlə gələcəkdə ola bilsin ki,
"28 may", "Sahil" və digər stansiyalarda yenidənqurma işləri aparılsın".
T. Əhmədov onu da bildirib ki, 2006-cı ildən Bakı Metropoliteninə yatırılan
investisiya hesabına "Nəsimi" (2008-ci ildə), "Azadlıq prospekti" (2009-cu
ildə), "Dərnəgül" (2011-ci ildə) yeni stansiyaları istifadəyə verilib, eyni
zamanda 2009-cu ildə "28 May" və "Cəfər Cabbarlı" stansiyalarının ikinci çıxışı
açılıb və "İçərişəhər" stansiyasının yenidən qurulması həyata keçirilib. "Məşədi
Əzizbəyov" stansiyasının da görkəmi dəyişəcək. Belə ki, stansiyanın vestibülü
piramida şəklində olacaq. Bununla yanaşı, stansiyada 6 giriş-çıxış olacaq.
Yenidənqurma işləri 2012-ci ilin yanvarın 1-dək başa çatdırılacaq".
Qeyd edək ki, "Məşədi Əzizbəyov" stansiyasında aparılacaq yenidənqurma işləri
nəticəsində keçidin yeri dəyişdiriləcək, daxili interyer yenilənəcək, tavan
6,45 metr hündürlüyündə olacaq, həmçinin yeni giriş və çıxışlar açılacaq.
Metropolitendə təhlükəsizliyin təmin olunmasına gəldikdə isə T. Əhmədov qeyd
edib ki, metropolitendə təhlükəsizlik tədbirlərinə xüsusi diqqət yetirilir.
Belə ki, hazırda Bakı Metropolitenində üst tanınma, sayma və videomüşahidə
kameraları quraşdırılıb: "Görülən işlər məni tam qane edir – o baxımdan ki,
dünya metropolitenindən fərqli bizim 3 minədək videomüşahidə kameramız
mövcuddur. Üst tanınma kamerası isə MDB məkanında yalnız Bakı
Metropolitenindədir".
Qeyd edək ki, 44 il bundan öncə, yəni 1967-ci ilin noyabrın 6-da Bakı Metropolitenində ilk qatar yola salınıb.
Yeraltı şəhərin "meri" yerüstü sakinləri sevindirdi...
Hafiz Əhmədov
O.M.