Yunanıstan Türkiyədən 50 taktiki pilotsuz uçuş aparatı (PUA) alacaq

Yunanıstan Müdafiə Nazirliyinin Türkiyənin "Assuva" şirkətindən 50 taktiki pilotsuz uçuş aparatı (PUA) sifariş verdiyi məlum olub.

Oxuməni.az xəbər verir ki, bu barədə "Defens Nyus" agentliyi məlumat yayıb.

Bildirilib ki, Yunanıstan sözügedən şirkətlə hətta müqavilə də imzalayıb. Bundan öncə isə Yunanıstana göndərilən iki "Proton Elik RB-128" tipli PUA-nın uğurla sınaqdan keçirildiyi vurğulanıb.

"Assuva"nın rəhbəri Rəmzi Başbuğ açıqlamasında həm NATO, həm də Avropa Birliyinə üzv ölkə ilə ilk ixrac razılaşması imzalandığını təsdiqləyib:

"Yunanıstana ixrac üçün bütün lazımi lisenziyaları aldıq".

Yunanıstana satılacaq PUA-ların axtarış və xilasetmə missiyalarında istifadə ediləcəyi qeyd olunub. Məlumata görə, sözügedən PUA-lar yeraltı bunkerləri, partlayıcı maddələri, qurudakı minaları və kimyəvi maddələri də aşkar edə bilər.

Bu PUA-larda 1 kilometr uzaqlıqdakı hədəfi və 50 metrədək yeraltı görüntüləri çəkə bilən termal kamera var.

Qeyd edək ki, daha öncə sözügedən PUA-lar Çin və Şri-Lanka ordusuna da göndərilib.

Oxuməni.az