Türkiyədəki Azərbaycan izini kimlər və niyə itirir? - Bakı, Vahabzadə, Qabil “silindi’

Türkiyədəki Azərbaycan izini kimlər və niyə itirir? - Bakı, Vahabzadə, Qabil “silindi’

22 Dekabr 2017 15:38
Bəyəndim (0) Bəyənmədim (0)

Bir vaxtlar tanınmış iş adamı, həmyerlimiz Mübariz Mənsimova məxsus olan və bir neçə il öncə başqa azərbaycanlılara satılan Türkiyədəki müxtəlif obyektlərin Azərbaycanı simvolizə edən adları dəyişdirilib.

Məlumata görə, bir neçə il bundan əvvəl Türkiyədə böyük səs-küylə açılışı olan "Baku Plaza" otelinin adı dəyişdirilib. Açılış mərasiminə Türkiyənin tanınmış isimlərinin qatıldığı otelin adının "Baku" qoyulması üçün Mənsimovun xeyli əngəli aşdığı, ancaq İstanbulun ən mərkəzi yerində olan bu brendin o binanı satın alan azərbaycanlılar tərəfindən qısa zamanda ortadan qaldırılması mövzudan xəbərdar olan hər kəsi təəccübləndirdi.

Türkiyənin İstanbul şəhərinin ən mərkəzi rayonlarından birində – Ləvənddə, dəyəri 150 milyon dollar olan 7 ulduzlu "Baku Plaza" otelinin açılışı həm Türkiyə, həm də Azərbaycan mediasında geniş işıqlandırılmışdı.

Yayılan məlumatlara görə, sonradan adıçəkilən otel anonim bir şirkət tərəfindən alınıb və bundan sonra "Baku Plaza" "Hyat Centric"ə çevrilib. Yeni rəhbərliyin "Bakı" adına niyə düşmən kəsildiyi isə hələlik məlum deyil. Ən acınacaqlısı isə Mübariz Mənsimovun şəxsi təşəbbüsü ilə gətirilən və otelin divarlarını bəzəyən Azərbaycanın qədim guşələrini özündə əks etdirən rəsm əsərlərinin yığışdırılmasıdır. Məlumata görə, otelin yeni sahibləri bu göstərişi alqı-satqı baş tutduqdan dərhal sonra veriblər.

Bundan başqa vətənpərvər iş adamının ölkəmizin təbliği naminə gəmilərə həkk etdirdiyi Azərbaycanın görkəmli simalarının adlarının da pozulması barədə məlumatlar yayılıb. Məsələ ilə bağlı gununsesi.info saytının apardığı araşdırma zamanı bəlli olub ki, "Palmali Group"dan anonim şirkət tərəfindən alınan gəmilərin də adını dəyişib. Adı dəyişdirilən gəmilərdən biri də xalq şairi Qabilin adına olan tankerdir. Adı dəyişdirilən yük tankerləri arasında Bəxtiyar Vahabzadənin adını daşıyan gəminin də olduğu bildirilir.

Bu istiqamətdə araşdırmalar davam edir. Doğrudur, sayt bunu edənin Azərbaycanın müvafiq dövlət şirkəti olduğunu iddia edir. Ancaq inanmaq olmur ki, Azərbaycan dövlətinə bağlı şirkət min bir əzabla Türkiyədə salınmış izləri bir silgi ilə silib, atır.

Buradan belə təsəvvür yaranır ki, Mənsimovdan otel və gəmiləri alanlar fərasət sahibi olmadıqlarından həmin obyektləri ermənilərə icarəyə veriblər. Onlar da bizim bütün izlərimizi Türkiyədən silmək istəyirlər. Belə ki, Azərbaycana qarşı belə düşmənçiliyi yalnız ermənilər edə bilərlər. "Bakı", "Qabil", "Bəxtiyar Vahabzadə" adları əslən azərbaycanlı olan və erməni kilsəsinə getməyən birisi üçün niyə arzuolunmaz hesab olunsun ki?!

Yenicag.Az