AMAY ticarət mərkəzinin rəhbərliyi azadlığa buraxıldı
Bakı Apelyasiya Məhkəməsində
AMAY ticarət mərkəzinin direktoru Elşən Novruzov, məsul işçiləri Yusif Kərimov
və Zakir Məmmədovun birinci instansiya məhkəməsinin hökmündən verdikləri
apellyasiya şikayəti əsasında məhkəmə prosesi başa çatıb. Prosesdə məhkəmənin
yekun qərarı elan olunub. Qərara əsasən, apellyasiya şikayəti təmin olunub. Hər
üç şəxs barəsində birinci instansiya məhkəməsinin çıxardığı hökm ləğv olunub.
E.Novruzovun cəzası 11 ildən 9 ilə, Yusif Kərimovun və Zakir Məmmədovun cəzası
isə 8 ilə endirilib və şərti hesab olunub. Onlar məhkəmə zalından azadlığa
buraxılıblar.
Qeyd edək ki, Bakı Ağır Cinayətlər Məhkəməsinin hökmü ilə Elşən
Novruzov 11 il, məsul işçiləri Yusif Kərimov 10 il və Zakir Məmmədov 10 il müddətinə
azadlıqdan məhrum edilmişdilər.
Onlar "Texnikabank"dan aldıqları kreditləri təyinatı üzrə xərcləməməkdə
və götürdükləri öhdəliyə görə ödənişlər etməməkdə təqsirləndirilirlər. Hər üç şəxs
Cinayət Məcəlləsinin 178.3.2-ci (dələduzluq), 179.3.2-ci (mənimsəmə və israf
etmə) və 308.1-ci (vəzifə səlahiyyətlərini aşma) maddələri ilə ittiham
olunublar.
O.M.