Əmək və Əhalinin Sosial Müdafiəsi Nazirliyinin əməkdaşının məhkəməsi başladı
Bu gün Bakı Ağır Cinayətlər Məhkəməsində Əmək və Əhalinin Sosial Müdafiəsi Nazirliyinin 11 saylı Tibbi Sosial-Ekspert Komissiyasının rüşvətxorluqda təqsirləndirilən sədri Vahid Gülmalıyevin cinayət işi üzrə məhkəmənin baxış iclası keçirilib. Prosesdə dövlət ittihamçısı ittiham aktını elan edib. Daha sonra təqsirləndirilən şəxs ifadə verərək, özünü təqsirli bilmədiyini deyib.
Proses yanvarın 30-da davam etdiriləcək.
Qeyd edək ki, Baş Prokurorluğun yaydığı xəbərə görə, 2-ci
qrup əlil Talıb Fərəcovun təkrar müayinədən keçərək əlillik dərəcəsinin təyin
olunması üçün ondan rüşvət tələb edilməsi barədə 3 oktyabr 2011-ci il tarixdə
Azərbaycan Respublikasının Baş prokuroru yanında Korrupsiyaya qarşı mübarizə
idarəsinin "161-Qaynar xətt" əlaqə mərkəzinə etdiyi müraciəti üzrə tədbirlər
həyata keçirilib, cinayət törətmiş şəxs ifşa olunaraq məsuliyyətə cəlb edilib.
Belə ki, Əmək və Əhalinin Sosial Müdafiəsi Nazirliyinin 11
saylı Tibbi Sosial-Ekspert Komissiyasının sədri Vahid Gülmalıyev təkrar
komissiyadan keçmək üçün müraciət edən Talıb Fərəcovdan 2-ci qrup əlillik dərəcəsinin
təyin olunmasından ötrü 500 manat məbləğində rüşvət tələb edib, sonuncu bir gün
sonra 400 manat düzəldə biləcəyini bildirdikdən sonra bu barədə onunla
razılaşıb.
Keçirilmiş əməliyyat tədbirləri nəticəsində 5 oktyabr
2011-ci il tarixdə Vahid Gülmalıyev 11 saylı Tibbi Sosial Ekspert
Komissiyasının fəaliyyət göstərdiyi binada Talıb Fərəcovdan 400 manat məbləğində
rüşvət alarkən cinayət başında yaxalanıb.
O.M.