Dövlət ittihamçısı İslam partiyasının sədr müavininə 2 il 6 ay hökm istədi
Bu gün Sumqayıt şəhər Məhkəməsində Azərbaycan İslam Partiyası sədrinin həbsdə olan təşkilati işlər üzrə müavini Arif Qəniyevin cinayət işi üzrə məhkəmə prosesi davam etdirilib. Vəkil Anar Qasımovun verdiyi məlumata görə, prosesdə dövlət ittihamçısı çıxış edərək, A.Qəniyevin 2 il 6 ay müddətinə azadlıqdan məhrum edilməsini istəyib. Proses yanvarın 26-da davam etdiriləcək.
Qeyd edək ki, A.Qəniyev Azərbaycan Milli Təhlükəsizlik
Nazirliyi (MTN) və Baş Prokurorluq tərəfindən birgə həyata keçirilmiş istintaq
hərəkətləri və əməliyyat-axtarış tədbirləri nəticəsində həbs olunub. O, Azərbaycana
qarşı düşmənçilik fəaliyyəti aparmaqda, xarici dövlətə və onun nümayəndələrinə
kömək etməkdə, eləcə də ölkədə iğtişaşların törədilməsində, ictimai təhlükəsizliyin
pozulmasında, insanların itaətsizliyə təhrik edilməsində şübhəli bilinir.
Keçirilmiş baxışlar nəticəsində Arif Qəniyevin üzərindən təxminən
19 qram narkotik vasitə olan həşış və ona məxsus avtomobildən 1 ədəd "Makarov"
tipli tapança, həmin odlu silaha aid 1 ədəd tapança darağı, 5 ədəd "PM" patronu
aşkar edilərək götürülüb.
O.M.