"Yeni Müsavat" qəzetinin əməkdaşı prezidentə məktub yazmağa hazırlaşır
Noyabrın 8-də axşam saat 20-də "Yeni Müsavat" qəzetinin əməkdaşı Elşad Məmmədliyə qarşı avtoxuliqanlıq edilib. Bu barədə Qafqazinfo məlumat yayıb. Məlumatda bildirilir ki, jurnalist öz maşını ilə gedərkən arxadan gələn "CİP" ötmə əməliyyatı qaydasını pozaraq onun maşınının sağına keçib.
E.Məmmədli iddia edir ki, sürücü bunu qəsdən edib: "O maşın arxamca
gəlirdi. Qəribədir ki, ekologiya postuna çatmağa 50-60 metr qalmış sürücü mənə
yoldan çıxmağım üçün işıqlarını yandırıb-söndürməklə işarə etməyə başladı.
Həmin saatda Bakı-Sumqayıt yolunda hərəkət intensiv olduğu üçün sürətlə sürmək,
ya da bir zolaqdan digərinə keçmək mümkün deyildi. İkincisi isə posta çatan
sürücülər sürəti azaldır, saatda 40-50 km sürətlə hərəkət edir. Arxamca gələn
"CİP" isə qəfildən sağıma keçib məni sola sıxmağa başladı. Yolun
ortasındakı dəmir dirəklərə qədər sola çıxsam da, sürücü maşınını üstümə
sürməkdə davam etdi. Onun yaratdığı ağır qəza şəraitindən yayınmaq üçün maşını
sərt tormozla birtəhər saxladım. Yolda kritik durum, arxadan gələn maşınlar
üçün təhlükə yarandı. Bu vaxt "CİP" sürətlə hadisə yerindən qaçmağa çalışdı.
Özümü itirməyib nömrəsini götürmək üçün arxasınca sürdüm. Yolda maşın çox idi
deyə o çox uzaqlaşa bilmədi, nömrəsini götürdüm. Bundan sonra bu barədə Dövlət
Yol Polisi İdarəsinə və "Yeni Müsavat"ın rəhbərliyinə məlumat verdim. Bu, ya
sui-qəsd cəhdi, ya da hansısa birinin harınlıqdan irəli gələn hərəkətidir. Hər
iki halda onun cəzalandırılmasını tələb edirəm".
E.Məmmədli dedi ki, DYP ilə dünən əlaqə saxlayıb və araşdırmaların nəticəsini
öyrənib: "Mənə dedilər, maşının markası "Lexus"dur, Nərimanov rayonunda
qeydiyyatdadır. Lakin dünən gün ərzində DYP-dən o sürücünün evinə açılan
telefon zənglərinə cavab verilməyib. DYP-dən deyildi ki, sürücü axtarılır və
tapılan kimi müvafiq tədbir görüləcək".
Jurnalist dünən DYP-yə yazılı qaydada da şikayət edib: "İnanmaq istəyirəm ki,
hüquq-mühafizə orqanları onu tapıb cəzalandıracaq. Çünki nömrəsi bəlli olan
maşının sahibini tapmaq çətin deyil. Əgər o sürücü kiməsə arxayındırsa və
cəzadan yayınacağını hesab edirsə, mən bu hadisə haqda birbaşa prezidentə
müraciət etməyə məcbur olacağam. Prezident hələ üç il öncə avtoxuliqanlarla
bağlı göstəriş vermişdi ki, cinayət törədən sürücülər barədə ona məlumat
verilsin. Sürücü tapılmasa, bu haqda prezidentin ünvanına da yazacağam".
Prezident seçicilərin sayından asılı olmayaraq, hər bir vətəndaşın prezidentidir...
Sərvər Aslanov
O.M.