Ayaz Mütəllibovun ailəsində 2-ci faciə baş verdi
Yeni Müsavat qəzetinin bu gün yaydığı məlumata görə, dünən saat 12:30 radələrində "Lexus" markalı avtomobillə üç nəfəri öldürən xanım haqqında xəbər yayılıb. Artıq indilərdə məlum olub ki, hadisəni törədən Azərbaycanın sabiq prezidenti, bu günlərdə oğlunun dünyasını dəyişməsi ilə bağlı ölkəyə gələn Ayaz Mütəllibovun nəvəsidir. Araz Əlizadə faktı təsdiq edib. O, Milli.Az xəbər portalına açıqlamasında bildirib ki, Mədinə Mütəllibovanın yol qəzasında heç bir günahı yoxdur. Çünki mərhum piyadalar qadağan olunmuş ərazidən avtomobil yoluna daxil olublar. M.Mütəllibova həbs edilməyib.
Qeyd edək ki, Bakı şəhəri Suraxanı rayonunda ağır
yol-nəqliyyat hadisəsi baş verib. Suraxanı Rayon Polis İdarəsindən Lent.az-a
verilən məlumata görə, Aeroport şosesində "Lexus" yolu keçmək istəyən üç
piyadanı vurub. Dəqiqləşdirilmiş informasiyaya görə, qəza nəticəsində ölən
şəxslər yaşlı kişi və azyaşlı oğlan uşağıdır. Yaralı qadın isə 3 saylı Şəhər
Xəstəxanasına aparılıb.
Ölən şəxslərin kimliyi araşdırılır. Qəzanı törədən şəxsin kimliyi
aydınlaşdırılıb. Bu, Bakı şəhər Yasamal rayon sakini 1992-ci il təvəllüdlü
Mütəllibova Mədinə Zaur qızıdır. 19 yaşlı qız anasının adına olan 90 XH 042
nömrə nişanlı "Lexus GS" ilə qəza törədib.
Hüquq-mühafizə orqanlarındakı mənbədən "Trend"ə bildiriblər ki, yol
qəzasını törədən Mədinə Mütəllibova eks-prezident Ayaz Mütəllibovun kiçik oğlu
Zaur Mütəllibovun qızıdır.
Azərbaycan Sosial Demokrat Partiyasının (ASDP) sədri Araz Əlizadə
"Trend"ə açıqlamasında Mədinə Mütəllibovanın Ayaz Mütəllibovun nəvəsi
olduğunu təsdiqləyib. ASDP sədri bildirib ki, hadisə yerüstü piyada keçidinin
yaxınlığında baş verib.
Qeyd edək ki, A.Mütəllibov 19 illik mühacirət həyatından sonra avqustun 8-də
vəfat edən böyük oğlu Azad Mütəllibovun dəfnində iştirak etmək üçün Bakıya
gəlib.
O.M.