Hamilə arvadını, yeznəsini öldürən Salyan sakini...

Hamilə arvadını, yeznəsini öldürən Salyan sakini...

2 Aprel 2013 19:41
Bəyəndim (0) Bəyənmədim (0)
Baş Prokurorluq 15 il həbs cəzasını həddən artıq humanist addım saydı, ancaq məhkəmə...

Şirvan Apellyasiya Məhkəməsində xüsusi amansızlıqla qətl hadisəsi törətməkdə, iki və ya daha çox şəxsi öldürməyə cəhd etməkdə təqsirli bilinən Salyan rayon sakini, 1986-cı il təvəllüdlü Xəlil Hüseynovun cinayət işi üzrə məhkəmə başa çatıb. İttihama görə, Xəlil Hüseynov arvadı Kübra Axundovanın başqa kişilərlə intim münasibətlərdə olmaqla ona xəyanət etməsindən şübhələnib. Xəlil 2012-ci il iyulun 27-nə keçən gecə bu barədə arvadını sorğu-sual edərkən ondan öz bacısının əri Zaur Gözəlovun və xalası oğlu Cəlal Baxışovun onunla zorla cinsi əlaqədə olduqlarını eşidib.

Qısqanclıq və qisas

Xəlil Hüseynov arvadından Zaur Gözəlov və Cəlal Baxışovun hərəkətlərini eşidib və sözügedən cinayəti törətmək qərarına gəlib. Bu məqsədlə 27 iyul 2012-ci il tarixdə saat 13:00 radələrində Salyan rayonunun Arbatan kəndində yaşadığı evdən mətbəx bıçağı və üstündə gəzdirdiyi cib bıçağını götürərək həyətdəki bağda hamilə vəziyyətində olan Kübra Axundovanı yerə yıxıb. Onu əzab, işgəncə verməklə xüsusi amansızlıqla qətlə yetirib.

16 bıçaq zərbəsi

Arvadını işgəncə ilə qətlə yetirəndən dərhal sonra Xəlil Hüseynov həmin gün saat 14:00 radələrində Ələt-Astara avtomobil yolu ilə Salyan rayonunun Arbatan kəndinə gedən yolun kəsişməsində yerləşən "Hafiz" inşaat materialları mağazasına gəlib. Orada işləyən Zaur Gözəlovu bayıra çağıraraq mağazanın arxasında bıçaqla bədəninin müxtəlif nahiyələrinə 16 dəfə zərbə vurub. O, həmin bıçaq zərbələrini vurandan sonra Zaur Gözəlovun ölməsinə əmin olub və hadisə yerindən uzaqlaşıb.

Baş tutmayan qətl...

Həmçinin Xəlil Hüseynov həmin gün saat 14:00 radələrində qəsdən adam öldürməyə yönəlmiş niyyətini davam etdirərək Kübra Axundovanın xalası oğlu Cəlal Baxışovu axtarıb. Onu Salyan şəhəri Y.Qasımov küçəsində yerləşən "Optika" mağazasının qarşısında görüb. Xəlil həmin vaxt Cəlal Baxışova yaxınlaşaraq onu iki dəfə bıçaqlayıb. Lakin Cəlal Baxışova zərbələr vurarkən bıçaq sınıb. Ətrafdakı şəxslər Xəlil Hüseynovu tutaraq özü ilə götürdüyü digər mətbəx bıçağı ilə yenidən zərbələr vurmasına mane olub. Bundan sonra Cəlal Baxışov qaçaraq yaxınlıqdakı təmir olunan çayxanaya girib. Sonradan Salyan Rayon Mərkəzi Xəstəxanasına çatdırılan Cəlala zəruri tibbi yardım göstərilib, onun həyatını xilas etmək mümkün olub. Xəlil Hüseynov isə iradəsindən asılı olmayan səbəblərə görə öz əməlini başa çatdıra bilməyib.

15 il cəza

Bu cinayət işinə Lənkəran Ağır Cinayətlər Məhkəməsində baxılıb. Hakim Xamməd Nuriyevin sədrliyi ilə keçirilən prosesdə təqsirləndirilən şəxsə hökm oxunub. Məhkəmənin hökmü ilə Xəlil Hüseynov 15 il müddətinə azadlıqdan məhrum edilib.

Məhkəmənin hökmündən Baş Prokurorluq narazı qalıb və apellyasiya protesti verib. Prokurorluq Xəlil Hüseynovun ömürlük azadlıqdan məhrum edilməsini məqsədəuyğun hesab edib. Zərərçəkmiş tərəflər də apellyasiya şikayəti verərək, onun cəzasının ağırlaşdırılmasını istəyiblər.

Tərəflərin apellyasiya şikayətlərinə Şirvan Apellyasiya Məhkəməsində hakim Amil Dosiyevin sədrlik etdiyi kollegiyada baxılıb. Prosesdə Baş Prokurorluğun Dövlət İttihamının Müdafiəsi üzrə İdarəsinin apellyasiya və kassasiya instansiyası məhkəmələrində dövlət ittihamının müdafiəsi şöbəsinin prokuroru Ədalət Əzimov çıxış edib. O, Xəlil Hüseynovun Cinayət Məcəlləsinin 120.2.4, 120.2.7, 120.2.8 və 29,120.2.7-ci (qəsdən adam öldürmə) maddələri ilə məhkum olunması barədə Lənkəran Ağır Cinayətlər Məhkəməsinin hökmündən dövlət ittihamçısı Azər Abbasov tərəfindən verilmiş apellyasiya protestinin dəlillərini müdafiə edib. Prokuror eyni zamanda Xəlil Hüseynov tərəfindən törədilmiş cinayət əməllərinə görə cinayətlərin məcmusu üzrə cəza təyin edilməli olduğu halda, birinci instansiya məhkəməsi tərəfindən cinayət qanununun normasının düzgün tətbiq edilmədiyini, bununla da Cinayət Məcəlləsinin 66.3-cü maddəsinin tələblərinin pozulduğunu deyib. Həmçinin birinci instansiya məhkəməsi tərəfindən törədilmiş cinayət əməllərinin ictimai təhlükəlilik dərəcəsinin nəzərə alınmadığını bildirib.

Məhkəmədə zərərçəkmiş şəxslərin hüquqi varisləri Abdulrəhim Axundov və Nizam Gözəlov Xəlil Hüseynovun barəsində cəzanın ağırlaşdırılması ilə bağlı dövlət ittihamçısı tərəfindən verilmiş apellyasiya protestinin dəlillərini müdafiə etdiklərini bildiriblər.

"Arvadımın mənə xəyanət etməsindən şübhələnmişəm"

Prosesdə Xəlil Hüseynovun müdafiəçisi İdris Qasımov dövlət ittihamçısı tərəfindən verilmiş apellyasiya protestinin dəlilləri ilə razı olmadığını və eyni zamanda birinci instansiya məhkəməsi tərəfindən ədalətli cəza təyin edildiyini, cinayət qanununun normasının düzgün tətbiq edildiyini bildirib. Məhkəmədə Xəlil Hüseynov da çıxış edib. O, dövlət ittihamçısı tərəfindən verilmiş apellyasiya protestinin dəlilləri ilə razı olmadığını bildirib. Xəlil Hüseynov qeyd edib ki, Kübra Axundova ilə 2008-ci il iyulun 31-də evləniblər. Onun sözlərinə görə, Kübra Axundova ilə ər-arvad kimi yaşadıqları müddətdə iki uşaqları dünyaya gəlib: "Arvadımın mənə xəyanət etməsindən şübhələnmişəm. Buna görə də aramızda qısqanclıq zəminində mübahisələr başlayıb. Bu xəyanətin səbəblərini araşdırdıqdan sonra 27 iyul 2012-ci il tarixdə əvvəlcə arvadım Kübra Axundovanı, sonra yeznəm Zaur Gözəlovu bıçaqla öldürdüm. Arvadımın xalası oğlu Cəlal Baxışovu bıçaqlasam da, iradəmdən asılı olmayan səbəblərə görə onu öldürə bilmədim".

Ömürlük cəza təyin edilmədi

Bütün tərəfləri dinləyən məhkəmə heyəti sonda apellyasiya protesti üzrə qərarı açıqlayıb. Qərara görə, Xəlil Hüseynovun Cinayət Məcəlləsinin 120.2.4, 120.2.7, 120.2.8 və 29,120.2.7-ci maddələri ilə məhkum olunması barədə Lənkəran Ağır Cinayətlər Məhkəməsinin hökmündən dövlət ittihamçısı tərəfindən verilmiş apellyasiya protesti təmin olunmayıb. Məhkəmə təqsirləndirilən şəxsin ömürlük cəza alması ilə bağlı dövlət ittihamçısının protestini geri qaytarıb. Təyin edilmiş 15 il azadlıqdan məhrum etmə cəzası qüvvədə saxlanılıb.

Son söz əvəzi:

Cəmiyyəti həbsxanadan dəmir barmaqlıqlar ayırır. Biz onları qəfəsdə gördüyümüz kimi, onlar da bizi eyni barmaqlıqların arxasında görürlər. Kim bilir, bəlkə elə nəfsimizin məhbusu, şeytanın dustağı bizik?!

İnarə Rafiqqızı

O.M.