Siz probleminizi deyin, mütəxəssis cavab versin
Redaksiyaya gələn çoxsaylı məktub və mesajlarda oxucular yaşadıqları və üzləşdikləri xoşagəlməz hadisələrdən mənəvi psixoloji sarsıntılar keçirtdiklərini bildirir, dəyərli məsləhətlər istəyirlər. Beləcə, düşdükləri vəziyyətdən düzgün çıxış yolu axtarırlar. Biz bütün bunları nəzərə alaraq, hər bir oxucunun probleminə diqqət yetirib qoyulan mövzuya uyğun mütəxəssislərin fikirlərini sizlərə təqdim etməyi qərara aldıq. Sirdaşınız olan Oxumeni.az həyatın hər bir anında sizin yanınızda olduğu kimi bu işdə də öz dost əlini oxuculardan əsirgəmir. Odur ki, siz də düşdüyünüz çıxılmaz vəziyyət, qarşılaşdığınız problemlərlə bağlı bizə müraciət edərək tanınmış yazar İsa Rəvanın psixoloji məsləhətlərini ala bilərsiniz. Həftə boyu 055-785-84-83 nömrəli mobil telefona qarşılaşdığınız problemi qısa mesaj şəklində göndərə və ya zəng edə bilərsiniz.
İnsan ağlı ilə düşünür, qəlbi ilə sevir. Təbii ki, qəlb də öz sevgisi üçün hər zaman narahat olur. Bu gün də narahat ürəklərin suallarını imkan daxilində cavablandırmağa çalışacağam (qeyd: məlum səbəblərdən mobil telefonların ilk üç rəqəmini qeyd etmirəm).
055...99-92 nömrəli mobil telefonun sahibi yazır:
- Salam, İsa Rəvan. Mən 3 il birini sevmişəm, o da məni. Amma sonra elə oldu ki, başqa oğlanla evlənməli oldum, 5 aydır evliyəm. İndi əvvəlki sevdiyim oğlan məni yenə axtarır. Mənim də yadıma o düşəndə ağlayıram. Sizcə bu sevgidir? Mən nə edim?
İsa Rəvan:
- Təbii ki, bu yaşanan o sevginin yaddaşda qalan xatirəsidir. O, hələ tam halında silinməsə də, müəyyən vaxta qədər yaşanır. Siz artıq ailəlisiniz və bütün varlığınızla, təkrar edirəm, bütün varlığınızla ailənizə bağlanmalısınız. Belə olduqda tədricən onu unudacaqsınız. Düzdür, sevgini unutmaq çətindir, ancaq siz öz seçiminizi etmisiniz. Sizin xoşbəxtliyiniz naminə o oğlan da sizi axtarmamalıdır. Onun axtarmağı sevgidən çox ehtirasdan irəli gəlir.
055...25-73 nömrəli mobil telefonun sahibi yazır:
- Salam, mən yarım aydır ki, məni sevən bir oğlanla danışıram, özü də ciddi olaraq. Amma əvvəllər istədiyim birini hələ də ürəyimdən çıxara bilmirəm. Bilirəm ki, onunla mənimki çoxdan bitib, alınan məsələ deyil. Yenə də ürəyimdən çıxmır. Ancaq danışdığım oğlan məni çox sevir və ciddidir. Mən nə edim?
İsa Rəvan:
- İlk sevginiz alınmasa da, o sevgi hələ də tam olaraq qəlbinizdədir. İndiki sevginiz təzədir, bu sevginin qayğıları ilə əhatə olunduqca siz də sizi sevənə bağlanacaqsınız. Ona bağlandıqca əvvəlki sevgilinizi də unudacaqsınız. Əgər bu seçiminiz düzgündürsə, narahat olmağa dəyməz. Bu, onun sizə qarşı münasibətindən, yəni onun sizinlə söhbətinin mövzusundan asılıdır. Açıq-saçıq mövzulara toxunmağa çalışmırsa, deməli, münasibətiniz düzgün yoldadır.
055...-04-35 nömrəli mobil telefonun sahibi yazır:
- Hər kəsi salamlayıram. Mən bir oğlanı dəli kimi sevirəm, bir yerdə işləmişik. İndi o, işdən çıxıb, mənimlə də əlaqəni kəsib. Mən çox əzab çəkirəm. Nə edim ki, o, mənimlə yenidən əlaqə saxlasın? Məsləhətinizə çox ehtiyacım var.
İsa Rəvan:
- Sevgi qarşılıqlı olmalıdır. Birtərəfli sevgi istəkdir. Siz sevdiyiniz kimi sevilməlisiniz də. Əgər qarşı tərəf sizi sevmirsə, siz bilə-bilə özünüzə əzab verirsiniz. Siz kimisə məcbur edə bilməzsiniz ki, sizi sevsin. Sevgi özü ürəyə gəlməlidir. Çünki sevgidə nəvaziş və qayğı var, məcburiyyət yox. O, sizinlə əlaqəni kəsib, bu əlaqə bir yerdə işlədiyiniz üçün yaranmışdı. Birmənalı olaraq onun sizə qarşı sevgisi yoxdur. Siz sevdiyiniz üçün narahatsınız, o isə sevmədiyi üçün narahat deyil və əlaqə də saxlamır. Ən nəhayət, özünüzü zorla sevdirməyə məcbur etməyin. Qəlbinizin boşluğuna görə ona ehtiyac duyursunuz. İradənizə tabe olsanız, unudaraq əzablardan da qurtararsınız. Yadınıza salın ki, onu tanımamışdan əvvəl də yaşaya bilirdiniz.
055...-93-34 nömrəli mobil telefonun sahibi yazır:
- Salam, mənim sevdiyim oğlan mənimlə dalaşaraq acıq eləyib elçi göndərib aldı onu. İndi məndən əl çəkmir. Deyir, ya mənim olacaqsan, ya heç kimin. Məni hədələyir ki, heç kimi sevmə. "Ailənə qayıt, əl çək!" - deyirəm, getmir. Onu sevirəm, ancaq bildirmirəm. Necə eləyim ki, əl çəksin?
İsa Rəvan:
- Sevgidə küsmək, incimək olur, ancaq acıq olmur. Acıq eləyib başqasıyla evlənirsə, siz hələ də buna sevgimi deyirsiniz? İstəyən şəxs öz məqsədi uğrunda mübarizə aparır, sevgilisinə qovuşmaq üçün hər cəfaya dözür. Ancaq necə olur ki, o özü ailə qurur, sizə isə başqasıyla ailə qurmağa icazə vermir. Əgər sizi həqiqətən sevirdisə, nəyə görə başqası ilə evlənirdi və indi hansı üzlə sizdən sevgi tələb edir? Bu olduqca absurd görünür. Sevgi belə şeyləri qəbul etmir. O həm sizə, həm də ailə qurduğu xanıma böyük hörmətsizlik edir. Bununla belə, yenə də siz onu sevdiyinizi söyləyir və nə edəcəyinizi bilmirsiniz. Siz həm o xanımın xoşbəxtliyini, həm də öz gələcək səadətinizi kor etməyin. Sizin ixtiyarınız ondan asılı deyil. Artıq o, özünə ömür yolu seçib, siz də öz xoşbəxtliyinizi düşünün. Buna görə də onunla heç bir əlaqə saxlamamağa, zənglərinə cavab verməməyə çalışın.
070...-33-93 nömrəli mobil telefonun sahibi yazır:
- Salam, "Oxu məni". İlk dəfədir sizə yazıram. Mənim qız dostum var, ailəlidir, üç övladı var. Mən də ailəliyəm. Bir ildir onu axtarıram. Biz evli olsaq da, bir-birimizi sevirik. Mən nə edim, onu axtarım, yoxsa yox? Xahiş edirəm, mənə məsləhət verəsiniz.
İsa Rəvan:
- Siz gecikmiş sevginizin xatirəsini yaşayırsınız. Hər bir kəsin yaşadığı və baş tutmayan sevgisinin xatirəsi onun yaddaşına həkk olunur. Bu, təbii ki, hissin nostalji duyğusu olaraq qəlbdə qalır. Sizi duyğulandıran da o hissdir. Əlbəttə, onu axtarmağınız düzgün deyil. İndi o, ailə qayğılarını, analıq duyğularını yaşayır. Siz də həmçinin öz ailə xoşbəxtliyinizin keşiyindəsiniz. Həmçinin onu belə ciddi axtarmağınız həm öz ailənizi, həm də onun ailəsini sarsıda bilər. Birmənalı olaraq onunla maraqlanmağınızı, axtarmağınızı məsləhət görmürəm. Ətrafdakıların reaksiyasını təsəvvür edin.
070...-15-00 nömrəli mobil telefonun sahibi yazır:
- Salam, İsa müəllim. Sizdən məsləhət istəyirəm. Mən bir qıza vurulmuşam, amma sevgimi aşkar etməyə utanıram. Çünki el içində necə olar, onun 16, mənim 23 yaşım var?
İsa Rəvan:
- Aranızdakı yaş fərqi qəbahət deyil. Sadəcə olaraq, o, hələ məktəblidir. Siz əgər həqiqətən sevirsinizsə, illərinizi qurban verib onun məktəbi bitirməyini də gözləməlisiniz. Ancaq bu illərinizi hədər etməmək üçün onun başqasına razılıq verməməyinə də əmin olmalısınız. Ona görə də bir yolla fikrinizi qıza çatdırmalısınız. Əsasən bu yaş dövrünün onlarda həssaslıq, çılğınlıq və keçid dövrü olduğunu da unutmayın. Onun qəlbini tam halında sevgi ilə oyatmayın. Kənar qüvvələrdən qoruyaraq qayğınızla əhatə edin.
055...-25-06 nömrəli mobil telefonun sahibi yazır:
- Salam, əzizimiz İsa. Nəhayət, mən də sizə yazmağa qərar verdim. Mən iki ildir bir oğlanla sevgili idim. 1 ay əvvəl onun çox yaxın dostu məni sevdiyini bildirdi. Bu barədə sevgilimə dedim, o, mənə inanmadı. Heç sevgilimlə aram da yaxşı deyildi, çünki anası razılıq vermirdi. Mən sadəcə, əsəblə onun dostuna razılıq verdim. 1 aydır görüşürük, çox mehriban, qayğıkeş insandır. Çox dəyər verir mənə, onu hədsiz çox istəyirəm. Amma mənə çox çətindir, həm keçmiş sevgilim məni rahat buraxmır, həm də ətrafdakılar haqqımda nə düşünər: keçmiş sevgilisinin dostu ilə birlikdədir? Xahiş edirəm, mənə məsləhət verəsiniz.
İsa Rəvan:
- Burada məsələ bir qədər mürəkkəbləşir. Əvvəlki sevgilinizin anası sizin bu hərəkətinizi əlində bayraq edərək oğluna öz fikirlərinin düz olduğunu deyəcək. Digər tərəfdən də iki dost arasında narazılıq əmələ gəlir. Sizin oğlanı sevməyib ayrılmağınız başqa, anasına görə ayrılmağınız isə başqa bir şeydir. 2 il az vaxt deyil bir-birinizi tanımaq üçün. Əgər sevirdinizsə, niyə ayrıldınız, sevmirdinizsə, niyə onu ümidli edirdiniz? Siz 2 dilemma qarşısında qalmısınız. Buna görə də tərəddüd içindəsiniz. Sadəcə, sizin əvvəlki sevgilinizə qarşı tam halında sevginiz olmayıb. Belə olsaydı, onun dostuna razılıq verməzdiniz. Ürəyə hökm etmək olmur, ürək kimi yaxın bilirsə, ona da razılıq verir. Qəlbinizin səsinə qulaq asaraq qərarı da özünüz verməlisiniz. Siz artıq öz seçiminizi etmisiniz. Bundan sonra əvvəlki sevgilinizin anası çətin ki, sizi qəbul etsin. İndi fikrinizi cəmləyərək öz xoşbəxtliyinizi qoruyun.
055...07-80 nömrəli mobil telefonun sahibi yazır:
- Salam, İsa müəllim, sizdən dönə-dönə xahiş edirəm, mənə kömək edin. Bir qızı sevirəm, həm də dəlicəsinə. Aramız dəyib, demək olar ki, ayrılmışıq, amma onu unuda bilmirəm. Hal-hazırda bu SMS-i yaza-yaza gözümdən yaş gəlir. Mənim imkanım yaxşı deyil deyə, qız məndən ayrıldı. Aprel ayında tanışlığımızın 2 ili tamam olacaq. Mən bu il ərzində onun üçün çox şeylərdən əl çəkdim. Hətta siqareti tərgitdim, amma o, mənə əzab verir. Hər axşam gedirəm iş yerinə, uzaqdan dayanıb işdən çıxmasını gözləyirəm. Onu uzaqdan da olsa görüb sakitləşirəm. 2 dəfə intihara cəhd etmişəm, yenə o həddəyəm, sadəcə, gözlərim önünə anam gəlir. Xahiş edirəm, mənə kömək edəsiniz. Hətta vaxtınız varsa, zəng edim, mənə məsləhət verin. İsa müəllim, xahiş edirəm, kömək edin.
İsa Rəvan:
- Sevgi qəlbin hakimidir, qəlb onun hökmü ilə hərəkət edir. Ancaq intihar və digər düşüncələr ağıl sayəsindədir. İntihar günah və əzablardan qaçmaq deməkdir. Sevgi və həyat sevmək üçündür, əzabla yaşamaq üçün deyil. O qıza başa salın ki, xoşbəxtlik var-dövlətdə deyil, səmimi, qarşılıqlı, təmiz qəlblə olan həqiqi sevgidədir. Əgər o, bunların fərqinə varmasa, siz də uzaqlaşmağa çalışın. Çünki var-dövlət düşkünü olan qəlbi sevgiyə məcbur etmək düzgün deyil. Sizin onun arxasınca sürünməyiniz onun sizə qarşı olan ikrahını daha da artırır. Siz sevginizi dəyərləndirdiyiniz kimi o da düşünərək buna layiq olmalıdır. Bir qədər soyuqqanlı hərəkət edin, nə vaxtsa o qız da öz səhvini başa düşəcək. Siz ananızı və gələcəyinizi düşünün. Öz sevginiz kimi həyatda yaşamaq uğrunda da mübariz olun. Bu sıxıntılarınızı zamana buraxın, zaman özü vaxtında hər şeyi həll edəcək. Mənimlə zəngləşib görüşmək isə problem deyil. İmkan və vaxt dairəsində hər zaman hazıram.
Oxucuların nəzərinə: Mesaj göndərən şəxs sonradan telefon zənginə cavab verməzsə, həmin mesaj dərc olunmayacaq. Bu səbəbdən də bir neçə mesaj dərc olunmadı.
İsa Rəvan
O.M.