Ali Məhkəmədə “Azercell Telekom” MMC şirkətinin şikayətini təmin etdi

Ali Məhkəmədə "Bakcell" MMC və "Azercell Telekom" MMC şirkətlərinin kasasiya şikayətləri əsasında məhkəmə prosesi başa çatıb. Prosesdə məhkəmənin qərarı elan olunub. APA-nın məlumatına görə, qərara əsasən "Azercell Telekom" MMC-nin kasasiya şikayəti təmin olunub.

Qeyd edək ki, əvvəlcə "Bakcell" MMC "Azercell Telekom" MMC ilə aralarındakı operatorlararası ara bağlantı tarifi üzrə müqaviləyə əlavənin bağlanmış hesab olunması, qarşılıqlı hesablaşma aktlarının etibarsız sayılması və vurulmuş zərərin tələb edilməsi barədə iddia ilə 1 saylı Bakı İnzibati İqtisad Məhkəməsinə müraciət edib. İddiada göstərilib ki, Rabitə və İnformasiya Texnologiyaları Nazirliyi 2009-cu aprel ayından etibarən ara bağlantı tarifinin 2 qəpik səviyyəsində tətbiq edilməsi barədə qərar qəbul edib. Lakin "Azercell Telekom" MMC tarif qiymətini dəyişdirməyib. Bunun nəticəsində şirkətə maddi ziyan dəyib.
Məhkəmə "Bakcell" MMC-nin şikayətini təmin edərək ara bağlantı tarifinin 2009-cu ilin aprelindən etibarən 1 dəqiqəsi 2 qəpikdən hesablanmasını və "Azercell Telekom" MMC tərəfindən iddiaçıya yaranmış borcların ödənilməsi barədə qərar qəbul edib. Bundan narazı qalan "Azercell Telekom" MMC apellyasiya şikayəti verib. Bakı Apellyasiya Məhkəməsi birinci instansiya məhkəməsinin qərarını qismən ləğv edərək yeni qərar çıxarıb. Həmin qərarla razılaşmayan şirkətlər isə kasasiya şikayəti ilə Ali Məhkəməyə müraciət ediblər.

O.M.