Prezidentlə görüşəcək tələbələrə indidən tualetə getmək tapşırıldı
Bu gün Moskva Dövlət Universitetinin Jurnalistika fakültəsinin tələbələri Rusiya prezidenti Dmitri Medvedevlə görüşəcəklər. Artıq hazırlıq işləri son mərhələdədir. İnterfax-ın məlumatına görə, tələbələrə əvvəlcədən təlimatlar verilir. İlk əvvəl qızlara tapşırılıb ki, çəkiliş zamanı prezidentə göz-qaş eləməsinlər və ya sifətlərini haldan-hala salmasınlar. Eyni zamanda qızlara yaxalarının düymələrini bağlamaq, açıq-saçıq görünməmək tapşırılıb. Tədbirin təşkilatçılarından olan Vladimir Kulikov Lomonosov auditoriyasında ciddi iş rejiminə nail olmaq istədiklərini bildirib: "Biz tələbələrə tapşırmışıq ki, telefonları söndürsünlər və səs effektlərindən istifadə etməsinlər. Prezidentə çox əl çalmayın, dəb deyil. Prezident zala daxil olanda istəyən ayağa dursun, amma bu məcburi deyil. Tualetə getmək istəyən isə indi getsin".
Görünür, təşkilatçılar rus tələbələrinin kəramətinə bələddir...
Aqil Hüseynov
O.M.