M.K.Atatürk 73 ildir aramızda yoxdur
Bu gün Türkiyə Cümhuriyyətinin banisi və ilk prezidenti Mustafa Kamal Atatürkün əbədiyyətə qovuşduğu gündür. O, bir çox tarixi qərarları ilə şanlı səhifələrə imza ata bilib. 1 noyabr 1922-ci ildə sultanlığı ləğv edib, 29 oktyabr 1923-cü ildə respublika idarə üsulunu tətbiq edib, 3 mart 1924-cü ildə xilafəti aradan götürüb, sivil qaydaları tətbiq edib, dərviş ordenlərini yığışdırıb, 1925-ci ildə geyim islahatı aparıb, 1926-cı ildə əlifbanı dəyişib və yeni Cinayət Məcəlləsini tətbiq etməyə başlayıb, 1928-ci ildə dinlə siyasətin ayrı olduğunu elan edib, 1934-cü ildə feodalizmin qalıqlarını aradan qaldırmaq məqsədilə yeni soyadları təklif edib, bir sözlə, bugünkü Türkiyənin təməlini qoyub.
Mustafa Kamal Atatürk 1881-ci ildə Yunanıstanın Selanik şəhərində anadan olub. Osmanlı imperiyası dövründə yüksək rütbəli zabit olan Mustafa Kamal 1919-cu ildə başlayan Milli Müqavimət Hərəkatına rəhbərlik edib, xarici işğalçılarla apardığı müharibədə əhəmiyyətli uğurlara imza atıb, ölkəsinin iri şəhərlərini işğaldan azad edib, müasir Türkiyə Cümhuriyyətinin sərhədlərini müəyyənləşdirib.
1921-ci ildə tarixli Sakarya döyüşündən sonra Mustafa Kamal "Qazi" adını alıb və marşal rütbəsinə qədər yüksəlib. 1938-ci ildəki vəfatına qədər 4 dəfə prezident seçilən Atatürk bu vəzifəni ən uzun müddət icra edən dövlət başçısı olub.
M.K.Atatürk demişdir: "Azərbaycanın dərdi bizim dərdimiz, sevinci bizim sevincimizdir"..
Hafiz Əhmədov
O.M.