Qızı intihar edən ana şayiələrdən fəryad etdi - FOTO

Qızı intihar edən ana şayiələrdən fəryad etdi - FOTO

13 Fevral 2017 08:40
Bəyəndim (0) Bəyənmədim (0)
"Siz yazın ki, qızım təmiz olub, qoy hamı bilsin"

Tovuzda Düz Qırıqlı kəndində bir neçə gün əvvəl intihar edən Aliyə Qəmbərovanın ailəsini ziyarət etdik, acılarını paylaşmağa çalışdıq.

Bu barədə millət vəkili Qənirə Paşayeva sosial şəbəkədəki səhifəsində məlumat yayıb. O, baş verən faciədən sonrakı narahatlığa da toxunub:

"Bu ailəni neçə ildir tanıyıram. Aliyə kiçik yaşlarında atasını itirib, anası 2 övladını böyütmək üçün gecə-gündüz çalışıb. Aliyə özü də ağıllı qız idi, kollecdə təhsil alırdı. Acılı anası və nənəsini Aliyənin gənc yaşda intihar etməsi o qədər üzmüşdü ki, danışdıqca gözlərindən yaş dolu acı axırdı. Onların acılarını isə dedi-qodular daha da artırmışdı. Gənc övladının acısı ilə qovrulan ananın dərdi qalmışdı bir tərəfə, övladının təmiz olduğunu hər kəsin bilməsini istəyirdi".

Ana millət vəkilinə dünyasını dəyişən qızının arxasınca tanımaza-bilməzə hərənin bir söz danışmasından narahatlığını dilə gətirib:

"Bir qız intihar edən kimi o dəqiqə başlayırlar onun haqqında mənfi düşünməyə. Bu nədən belədir axı? Sizdən bir xahişim var, siz yazın ki, qızım təmiz olub, qoy hamı bilsin. Övladım rahat yatsın. Sizdən sadəcə bunu istəyirəm", - deyirdi gözyaşlarıyla acılı ana. Nənəni isə məclisə gətirilən mollanın sözləri o qədər yandırıb ki, dayanmadan bunları deyirdi: "Belə şey etmək olarmı, Qənirə xanım? Uşağın cəsədini yumağa düşürdüm, birdən eşitdim ki, kimsə deyir, Allah rəhmət etsin, qonşu kəndlərin birindən gəlmiş molla da qayıdıb deyir ki, ona rəhmət düşmür. Molla belə danışarmı? Acımı o qədər artırdı ki onun o sözləri. Bunları söyləyin. Belə şeylər etmək olmaz. Onsuz da bizim acımız bizə ömürlük bəsdir. Bizim qəlbimizə bu cür sözlərlə yaralar vurmaq doğru deyil axı. Mənim nəvəm mələk kimi qız idi. Bir kimsəyə pisliyi dəyməyib. Çox ağırıma gəldi mollanın o sözləri. Qohumların bəziləri deyir, gərək bizə deyəydin eşitdiyin o sözləri, deyərdik çıxıb getsin yas məclisindən".

Millət vəkili sonda hamıya müraciət edib:

"Əziz insanlarımız, intihar o qədər ağır bir faciədir ki, bu addımı atan insanların əzizlərinin çəkdiyi acı, yaşadığı şok da çox böyük olur. Ona görə də bu ailənin sözləri əslində bütün cəmiyyətimizə ünvanlanıb. Daha həssas, daha anlayışlı olmalıyıq. Əslində. intiharları da ancaq bu cür yanaşma ilə azalda bilərik.

Evdən ayrılanda Aliyənin böyüdülmüş şəklindən bizə baxan məsum gözləri ilə qarşılaşdıq. Sanki bir şeylər söyləmək istəyirdi... Əslində söyləyirdi də... Nur içində yat, Aliyə. Gərək belə etməyəydin. Gözəl bir qızdın və bütün həyatın qabaqdaydı... Gənclərimizə səslənərək söyləmək istəyirəm ki, əziz gənclər, intihar çıxış yolu deyil. Həyatda nə çətinlik, problemlərlər olursa-olsun, insan mübarizə aparmalıdır və Allahın ona verdiyi ömürə əlləri ilə son qoymamalıdır. Üzləşdiyiniz problemləri anladın ailənizə, dostlarınıza, hətta tanımadığınız yad bir adama. Amma intihara əl atmayın. Çünki özünüzlə bərabər əzizlərinizin içərisindəki sevinc, mutluluq hissini də öldürəcəksiniz və onlara bəzən özlərinə ömür boyu bağışlaya bilməyəcəkləri "keşkə"lər buraxacaqsınız. Onunla isə yaşamaq çox çətindir... Çox..." (axar)

Mediainfo.az