Pilot qadın və bətnindəki körpənin meyitlərinin daxili və xarici müayinəsi aparılıb

2 Sentyabr 2016 16:35

Bəyəndim (0) Bəyənmədim (0)

Bakı şəhər Prokurorluğu pilot qadının ölümü ilə bağlı yayılan məlumatlara münasibət bildirib.

Şəhər Prokurorluğundan verilən məlumata görə, Dilarə Babayevanın vəfatı ilə bağlı Nəsimi rayon Prokurorluğunda Cinayət Məcəlləsinin 124.1-ci (ehtiyatsızlıqdan adam öldürmə) maddəsi ilə cinayət işi başlanıb. D. Babayevanın və onun bətnindəki körpənin meyitlərinin daxili və xarici müayinəsi aparılıb. Ölümün səbəblərinin müəyyənləşdirilməsi məqsədi ilə məhkəmə-tibbi ekspertizaları təyin edilib. Hazırda iş üzrə zəruri-istintaq tədbirləri davam etdirilir.

Qeyd edək ki, məlum hadisə bir neçə gün əvvəl baş verib. İlkin olaraq zəhərlənmə ehtimalı ilə 1 saylı şəhər xəstəxanasına daxil olan 1986-cı il təvəllüdlü Babayeva Dilarə Aydın qızı orada ölüb. D. Babayeva xəstəxanaya daxil olarkən hamilə olub və onun bətnindəki 36 həftəlik körpəsi də tələf olub.

D.Babayeva Dövlət Sərhəd Xidmətinin pilotu olub və o, kapitan hərbi rütbəsi daşıyıb.

Mediainfo.az