ANS-in məhkəməsi başladı

ANS-in məhkəməsi başladı

2 Sentyabr 2016 16:03
Bəyəndim (0) Bəyənmədim (0)

Bu gün 1 saylı Bakı İnzibati-İqtisad Məhkəməsində "ANS ÇM"in lisenziyasının ləğv edilməsi və ANS TV-nin fəaliyyətinin 1 ay müddətinə dayandırılması barədə Milli Televiziya və Radio Şurasının qərarlarından verilən şikayətə baxılır.

"Qafqazinfo"nun məhkəmədə iştirak edən əməkdaşının məlumatına görə, proses başlayıb. ANS rəhbərliyi Vahid Mustafayev və Mirşahin Ağayev başda olmaqla kanalın bir çox əməkdaşı iclasda iştirak edir.

Qeyd edək ki, ANS əvvəlcə məsələ ilə bağlı Bakı Apellyasiya Məhkəməsinə müraciət edib. Məhkəmə iddiaya 1 saylı Bakı İnzibati-İqtisad Məhkəməsində baxılmasını məqsədəuyğun hesab edib. İddia ANS Müstəqil Yayım və Media Şirkətinin "İnzibati aktın etibarsız hesab edilməsi" (yayımın müvəqqəti dayandırılması barədə 18 iyul 2016-cı il tarixli qərar) ilə bağlıdır.

Xatırladaq ki, MTRŞ Türkiyə ilə Azərbaycan arasında strateji tərəfdaşlıq münasibətlərinin pozulmasına yönəlmiş təxribatın qarşısını almaq, açıq şəkildə terrorizmin təbliğatına yol verməmək məqsədilə, Azərbaycan Respublikası Baş Prokurorluğunun 18 iyul 2016-cı il tarixli müraciətini, "Televiziya və radio yayımı haqqında" Azərbaycan Respublikası Qanununun 11, 23, 32-ci maddələrinin tələblərini rəhbər tutaraq "ANS Müstəqil Yayım və Media" Şirkətinin yayımının 18 iyul 2016-cı il tarixdən saat 18:30-dan etibarən 1 ay müddətinə dayandırılması barədə qərar qəbul edib.

Eyni zamanda, MTRŞ 25 oktyabr 2013-cü il tarixli TR 099 saylı xüsusi razılığın (lisenziyanın) qüvvəsinə xitam verilməsi barədə məhkəmədə iddia qaldırıb. Bakı Apellyasiya Məhkəməsində isə ANS-in lisenziyasına xitam verilməsi ilə bağlı qərar qəbul olunub.

Mediainfo.az