Bakıda yanan binaya görə həbs edilən şəxsin təcridxanada ölümü ilə bağlı araşdırma aparılır

Bu gün Bakı Ağır Cinayətlər Məhkəməsində Xətai rayonu ərazisində çoxmərtəbəli yaşayış binasında baş verən yanğınla bağlı təqsirləndirilən Fərid Sadıqov, Zaur Əşrəfov və Nüsrət Muxtarovun cinayət işi üzrə məhkəmə prosesi davam etdirilib.

Prosesdə hakim Eldar İsmayılov bildirib ki, təqsirləndirilən şəxs Nüsrət Muxtarov təcridxanada vəfat etdiyi üçün hüquqi varisi müəyyənləşməlidir. Hakim qeyd edib ki, ölüm faktı ilə əlaqədar Sabunçu Prokurorluğunda araşdırma aparılır.

Buna görə məhkəmə iyulun 26-dək təxirə salınıb.

Qeyd edək ki, ötən il aprelin 10-da Xətai rayonu, Zığ yolu küçəsi 16 saylı ünvanda "TNH" şirkəti tərəfindən fasadında "poliuretan" materialla üzləmə işləri aparılan doqquzmərtəbəli yaşayış binasında ağır nəticələrə səbəb olan yanğın qeydə alınıb.

Faktı üzrə Baş Prokurorluğun Ağır Cinayətlərə Dair İşlər üzrə İstintaq İdarəsində Cinayət Məcəlləsinin müvafiq maddələri ilə cinayət işi başlanıb. "TNH" şirkətinin fəaliyyətinə və görülən işlərə faktiki rəhbərliyi həyata keçirən Fərid Sadıqov, şirkətin direktoru Zaur Əşrəfov, şirkət direktorunun tikinti işləri üzrə müavini Nüsrət Muxtarov həbs edilib.

Mediainfo.az