"Sabunçu Robinzonu"nun ada evi söküldü

Bakıda tikilməkdə olan Olimpiya stadionunun yaxınlığındakı məşhur "ada-ev"in sakinləri nəhayət ki, arzularına çatıblar. Onlar yaşadıqları evlərindən Sabunçu Rayon İcra Hakimiyyəti ilə əldə edilən qarşılıqlı razılaşma əsasında köçürülüblər.

Mediainfo.az-ın məlumatına görə, bu barədə virtualaz.org saytına evin sahibi Ələkbər Hüseynov xəbər verib.

O, bildirib ki, evləri avqustun 16-da sökülüb, onları isə müvəqqəti olaraq Bakıxanov qəsəbəsində 4 otaqlı evə köçürüblər: "Avqustun 15-də icra hakimiyyətindən gələrək evdən razılıq əsasında köçürüləcəyimizi dedilər. Ertəsi gün Sabunçu rayon icra başçısı Adil Vəliyev və xeyli sayda polis əməkdaşı evimizə gəlib. Mən evdə yox idim. Yoldaşım zəng vurandan sonra evə gəldim. Məni və qardaşımı evə buraxmadılar. Evimizdə olan bəzi əşyaları çıxardılar. Qalanlarını isə evlə birlikdə uçurdular. Qardaşımı və məni polis bölməsinə apardılar. Qardaşıma 5 sutka həbs verildi. Məni isə axşama qədər polis bölməsində saxladılar".

Ə.Hüseynovun sözlərinə görə, evlərini sökərkən onlara mənzillə təmin olunacaqlarını deyiblər. Ailə Bakıxanovdakı evə köçürüldükdən sonra o, A.Vəliyevlə görüşüb: "İcra başçısından Qara Qarayev metrosu yaxınlığında ev istədiyimizi dedik. Həmin ərazinin Sabunçu rayonuna düşmədiyi üçün heç nə edə bilməyəcəklərini söylədi. İcra başçısı Bakıxanov qəsəbəsində, Sülh küçəsində (köhnə Axundov 17) mənim üçün 3, qardaşım üçün isə 1 otaqlı həyət evinin tikiləcəyini bildirdi. İndi yaşadığımız evin kirayəsi də icra hakimiyyəti tərəfindən ödəniləcək".

Hüseynovlar ailəsi hazırda Sabunçu rayon İcra hakimiyyətinin yaxınlığında yerləşən 5 mərtəbəli binanın 1-ci mərtəbəsində yaşayırlar. Həmin mənzil icra hakimiyyətinin balansındadır.

Ə. Hüseynovun sözlərinə görə onlarla hələ ki, müqavilə imzalanmayıb: "Həftənin 5-ci günü icra hakimiyyətinə qəbulda olacağıq. Evlə təmin olunmağımız haqda müqavilə imzalayacağıq".

Qeyd edək, "Dərnəgül yolu" kimi tanınan Ziya Bünyadov prospektindəki 12 saylı evdə (rəsmi ünvanları isə belədir: Böyükşor qəsəbəsi, 12) yaşayan Hüseynovlar ailəsi Bakı Olimpiya Stadionun tikintisi ilə bağlı başlanan söküntü işlərindən sonra evlərinə verilən kompensasiya ilə razılaşmayaraq 43 ildir yaşadıqları mənzildən çıxmırdılar. Bütün qonşular razılaşsa da onlar evlərini tərk etmirdilər. Prezident İlham Əliyev stadionunda aparılan tikinti işləri ilə tanış olmaq üçün stadiona gəldikdə ailə müxtəlif yollarla ölkə başçısından gizlədilirdi.

Qeyd edək ki, 14 aydan çox "ada-ev"də qazsız, susuz, işıqsız xanımı və iki azyaşlı uşağı ilə yaşayan Ələkbər Hüseynov "Sabunçu Robinzon"u kimi də məşhurlaşıb. Onun dediyinə görə, problemin həllini tapması prezident İlham Əliyevin məsələyə müdaxiləsindən sonra mümkün olub. "Stadionda çalışan işçilər mənə danışdılar ki, prezident vertolyotla stadionun tikintisini və "Duzlu göl"un qurudulması layihəsində işlərin gedişini müşahidə edərkən tikinti zonasında hələ də yaşayış olan evi görüb. Deyilənə görə prezident bu məsələ ilə maraqlanıb və dərhal problemin həll edilməsinə dair tapşırıq verib. Elə həmin günün axşamı icra hakimiyyətindən bizim evimizə gəlmişdilər, dedilər ki, eviniz sabah söküləcək və əvəzində evlə təmin ediləcəksiniz" deyə keçmiş "Robinzon" bildirir.