Kür və Araz çayları getdikcə quruyur

Kür və Araz çayları getdikcə quruyur

10 Fevral 2014 12:29
704
Bəyəndim (0) Bəyənmədim (0)

Kür və Araz çaylarının səviyyəsində azalma müşahidə olunur. Bu barədə Ekologiya və Təbii Sərvətlər Nazirliyinin Milli Hidrometeorologiya Departamentindən verilən məlumata görə hazırda Böyük Qafqazın Quba-Xaçmaz bölgəsi çaylarında sululuq ongünlük normanın 150-220, Kiçik Qafqazın çaylarında 130-140, Lənkəran-Astara bölgəsi çaylarında 50-70, Naxçıvan MR çaylarında isə 50 faizini təşkil edir.

Tranzit çaylarda da suyun səviyəsində azalma müşahidə olunur. Kür çayının Qıraqkəsəmən məntəqəsində suyun səviyyəsində 4 sm azalma müşahidə olunub. Hazırda məntəqədə su sərfi 128 m3/s olmaqla ongünlük normanın 77 faizini təşkil edir. 2013-cü ildə bu göstərici bir qədər çox olmaqla 142 m3/s və ongünlük normanın 86 faizini təşkil edib. Qanıx çayının Əyriçay məntəqəsində suyun səviyyəsində dəyişiklik müşahidə olunmayıb. Hazırda məntəqədə su sərfi 59 m3/s olmaqla, ongünlük normanın 86 faizini təşkil edir. 2013-cü ildə də bu göstərici bir qədər çox olmaqla 66 m3/s təşkil edərək ongünlük normanın 96 faizinə bərabər olub.

Kür çayının aşağı axınında suyun səviyyəsində azalma müşahidə olunub. Belə ki, Salyanda 9, Bankədə 7, Kür çayının Surra məntəqəsində, Şirvanda və Araz çayının Novruzlu məntəqəsində 10 sm azalma müşahidə olunub. Hazırda Surra məntəqəsində suyun səviyyəsi 404 sm (2013-cü il fevralın 10-da 458 sm), Şirvanda 285 sm (2013-cü il fevralın 10-da 348 sm), Salyanda 261 sm (2013-cü il fevralın 10-da 310 sm), Bankədə 232 sm (2013-cü il fevralın 10-da 261 sm), Araz çayının Novruzlu məntəqəsində isə 190 sm (2013-cü il fevralın 10-da 216 sm) təşkil edir.