Qanunsuz miqrasiyanın təşkili ilə bağlı cinayət işləri prokurorluğa tapşırıldı

Qanunsuz miqrasiyanın təşkili ilə bağlı cinayət işləri prokurorluğa tapşırıldı

3 Fevral 2014 17:55
Bəyəndim (0) Bəyənmədim (0)

Azərbaycanda qanunsuz miqrasiyanın təşkili ilə bağlı cinayət işlərinin ibtidai istintaqı prokurorluq tərəfindən aparılacaq. Bu gün Milli Məclisdə bununla bağlı Cinayət-Prosessual Məcəlləsinə (CPM) əlavə və dəyişikliklər edilməsini nəzərdə tutan qanun layihəsi qəbul edilib.

Qanun layihəsi barədə məlumat verən Hüquq siyasəti və dövlət quruculuğu komitəsinin sədri Əli Hüseynli bildirib ki, Azərbaycan Respublikasının Prezidenti İlham Əliyevin imzası ilə parlamentə daxil olan "Azərbaycan Respublikasının Cinayət-Prosessual Məcəlləsinə dəyişikliklər edilməsi haqqında" Azərbaycan Respublikasının Qanununda CPM-in 215.3.1-ci maddəsində "317-1.2" rəqəmlərindən sonra "318-1" rəqəmlərinin əlavə edilməsi nəzərdə tutulur. Yəni həmin maddədə göstərilən hallar sırasına Cinayət Məcəlləsinin (CM) 318-1-ci maddəsi də əlavə edilir.
Qeyd edək ki, CPM-in 215.3-cü maddəsində cinayət işləri üzrə ibtidai istintaqın hansı hallarda prokurorluq tərəfindən aparıldığı göstərilir.
Qanunsuz miqrasiyanın təşkili ilə bağlı olan 318-1-ci maddə isə ötən il dekabrın 29-da Milli Məclis tərəfindən CM-ə əlavə edilib.
Həmin maddəyə əsasən, əcnəbi və ya vətəndaşlığı olmayan şəxsin Azərbaycan Respublikasına qanunsuz gəlməsini, Azərbaycan Respublikası ərazisində qanunsuz qalmasını, Azərbaycan Respublikası ərazisindən qanunsuz tranzit keçidini və ya hər hansı şəxsin Azərbaycan Respublikasından qanunsuz getməsini təşkil etmə iki min manatdan beş min manatadək miqdarda cərimə və ya iki ilədək müddətə islah işləri və ya üç ilədək müddətə azadlıqdan məhrum etmə ilə cəzalandırılır.
Eyni əməllər mütəşəkkil dəstə tərəfindən törədildikdə, vəzifəli şəxs tərəfindən öz qulluq mövqeyindən istifadə etməklə törədildikdə, təkrar törədildikdə, eləcə də insan həyatı üçün təhlükəli üsulla törədildikdə iki ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə iki ildən beş ilədək müddətə azadlıqdan məhrum etmə ilə cəzalandırılır.